Къабарты-Малкъар Республиканы Башчысы

Къабарты-Малкъар Республиканы Башчысы К.В. Коковну Билимни кюню бла
АЛГЪЫШЛАУУ

Багъалы школчула бла студентле, хурметли ата-анала бла педагогла!
Сизни Билимни кюню бла алгъышлайма. Бу аламат, энчи байрам бизни барыбызгъа да багъалыды. Хар адамны да аны бла байламлы жылы сезимлери бардыла. Школчулагъа, эм алгъа уа бизни биринчи классха барлыкъчыкъларыбызгъа, бу кюнде кесини эшиклерин билимни сейирлик дуниясы ачады, техникумланы, колледжлени эмда вузланы биринчи курсларына барлыкъ студентлеге уа бу кюн кеслерини усталыкъларына уллу жолну башланыууду, педагоглагъа сюйген ишлерине къайтхан кюндю, ата-аналагъа уа юйюрде жууаплы, алай эсе да, кёлге асыулу жумушланы башланнганыны чагъыды.

Окъугъан заман – ол кесинги хунеринги эмда фахмунгу ачыкъларгъа, айнытыргъа, уллу жашаугъа тийишли билимни алгъан кезиудю.

Бюгюнлюкде биз республикада билим бериу качестволу болур ючюн битеу да онгланы къурайбыз. Школла бла сабий садла ишлейбиз, аланы шёндюгюлю оборудование бла жалчытабыз, профессионал билим бериуню инфраструктурасын жангыртабыз, школчулагъа, студентлеге, педагоглагъа окъургъа эмда ишлерге таплыкъ болурча хар затны да этебиз.

Къабарты-Малкъарда хурметли эмда магъаналы усталыкъгъа кертичи болгъан устазла бла насийхатчыла урунадыла. Ышанама, биз барыбыз да бирге жууукъ заманда республикада билим бериу системаны андан да бийик, игилендирилген, жангы даражагъа чыгъарлыкъбыз.
Таза жюрекден барыгъызгъа да саулукъ, ахшылыкъ эмда жетишимле тежейме.
Жангы окъуу жылны башланнганы бла алгъышлайма, багъалы шуёхла!