Республиканы атын иги бла айтдырады

Республикадан жаш адамла спортда, окъууда, ишде да жетишимли болсала, барыбыз да къууанабыз. Беккиланы Элдарны жашы Тамерланны да спортда жетишимлерине къарай, ёхтемленебиз.

Тамерлан профессионал баскетболчуду. Спортну бу тюрлюсюнден Европада, Россейде, СКФО-да да жаш тёлюню арасында бир ненча кере чемпион болгъанды. Баскетболгъа уа онтёрт жылында келгенди. Аны биринчи тренерлери Римма Кумыкова бла Анатолий Тхакахов эдиле. Онбеш жылында уа жашны «Автодорну» жаш тёлю командасыны санына чакъыргъандыла. Жарау эте, кесин иги жаны бла кёргюзте келгенде, «Рязань» анга эс бурады. Алай бла жарым жылдан сора жаш ол къауумгъа кёчеди, аны санында суперлигада доммакъ майдалгъа да тийишли болады.

Бир ненча жылдан а, «Автодорну» къауумунда ойнай, Бекки улуну  «Северстальгъа» бередиле, 2014 жылда уа ол Ростовну «Атаман» клубун къоруулайды.  Аны къауумунда Тамерлан  онтёрт оюнда 1,9 очко къоллу болады, «Автодоргъа» къайтханда уа «Суперлиганы чемпиону» деген атны алады.

Онжети жылында окъуна жашны ёсюмю эки метр бла эки сантиметр болады. Школну ол Саратовда айырмалы бошап, ызы бла Социал-экономика университетни экономика  бёлюмюнде окъугъанды.

Алай бек алгъа уа ол футболну сайлагъан эди. «Алты жылымда биринчи кере майданнга тюшеме да, аны сюйюп къалама. 7-чи  классда окъугъанымда уа, аппам бла – кеси заманында аты айтылгъан спортчу Беккиланы Азрет бла –  Минги тауну тийресине баргъан эдик. Анда уа баскетболчула бла танышама. Аланы баш тренерлери Римма Гузеровна, мени  кёрюп, аппама муну бизге берсенг эди, баскетбол бла кюреширге жараулу жашды, дейди. Алай бла аны къолунда жарау этип башлайма»,- дейди Тамерлан мени бла ушагъында.

Кертиди, Кумыкова жашны Саратовха жиберирге керекди дегенинде, жууукълары артыкъ ыразы тюйюл эдиле. Ол заманда тренер:«Тыймагъыз,  къарап туругъуз, сиз аны ол мында тургъанындан эсе телевизорда кёбюрек кёрлюксюз»,-деп, къаты сюеледи. Бюгюнлюкде ол айтханыча болгъанды. Тамерланны тукъуму чемпионатлада команданы башха жашларындан эсе аслам кере айтылады. Мында тенглери уа ол келтирген баскетбол майкаланы сюйюп, ёхтемленип киедиле.

Тамерлан айтханнга кёре, Саратовда баскетбол команданы жашлары бек кючлюле эдиле, ол аланы къатларында къарыусуз кёрюннгенди. «Бу спорт интернатха келгинчи, менден бийик жокъ суна эдим. Биринчи кюн ашханада ауузлана тургъанымлай, бир жаш киреди. Ол эки метрден бийик эди, аны ызындан келген а андан да узун – 2,6 метр. Дагъыда ючюнчюсю, тёртюнчюсю да ма аллай бойлула. Мени ёсюмюм а 1 метр 94 сантиметр эди»,- деп эсгереди жаш.

Алай эки жыл да озгъунчу, аны ёсюмю да бийик болады, кеси да бек  кючлюледен бирине саналады. Аны кесине уа арый-тала билмегени, жарауланы бош алай угъай, оюмлап этерге итиннгени себеплик этгендиле. «Командада женгил форвардма. Чабыууллукъ этеме. «Автодор» мени экинчи  юйюмдю. Аны къауумуна кирген жашла бла биз къарындашлача жашайбыз»,- дейди Бекки улу.

Тренер да аны эрине билмегени, къарыулу болгъаны ючюн да жаратып къойгъанды. Эки жылдан а ол Тамерланны Россейни жыйымдыкъ командасына жибергенди. Алай бла жаш 17-18-жыллыгъында РФ-ни  чемпионатына къатышханды, андан сора Европаны чемпионатында да кесин сынагъанды.

Жарауладан, эришиуледен бош заманында ол театргъа, киногъа барыргъа, китап окъургъа да сюйюучюдю. Юйге, анасы Лейлягъа, аппасы Азретге, ыннасы Светланагъа уа кюннге бир ненча кере сёлешеди. «Анам хар не  ишимде да билеклик этеди, ансыз спортчу да болалмаз эдим. Ол, аппам да мени бек кёллендиредиле, алгъа итиндиредиле. Ыннам а хар келгеним сайын тюрлю-тюрлю татыулу, татымлы аш-суу этип сыйлайды. Мен да бери келсем, аланы хар не кереклерине къарап, къолумдан келгенича болушургъа кюрешеме»,-дейди Темерлан. 

Жууукъларын, ахлуларын, тенглерин жокълагъаны бла къалмай, биринчи тренерлери Римма Кумыкованы, Анатолий Тхакаховну да кёрмей къоймайды. Жаш баскетболчулагъа мастер-классла береди, жараула этдиреди.
Мени бла ушакъ эте, ол республикада баскетбол иги айнымагъанына жарсыгъанды. «Мында ол къаллай сейирлик оюн болгъанын ангыламайдыла. Футболгъа къоранчланы жартысы анга бёлюнсе, республикабызда бек аламат баскетбол команда къураллыкъ эди»,- дейди жаш.

Узакъда болгъанлыкъгъа, ол республиканы жашаууна уллу эс буруп, спортчу жерлешлерибизни жетишимлерине къууанады. Мен аны бла ол бери къысха заманнга келген кезиуюнде ушакъ этгенме. Андан сора кёп да бармай жаш Саратовха учханды. Аны жараула, жууаплы эришиуле сакълайдыла. Алада ол командасы бла бирге бийик жетишимлеге жетеригине уа ишексизбиз.

Суратда: Беккиланы Тамерлан аппасы Азрет, ыннасы Светлана бла.