Къутхарыучуланы ишлери аслам болгъанды

Озгъан эки-юч кюнню ичинде от ёчюлтюучюлеге 35 кере чакъырыулагъа барыргъа тюшгенди. Кюнню къызыулугъу бла байламлы къыйын болумла адам улуну эссизлигинден чыкъгъан хаталадыла. 

 От ёчюлтюучюле асламында къургъакъ кырдык жаннган жерлеге чакъырыладыла.  Аны баш сылтауу уа адамла атып кетген тютюнде неда суу бла ёчюлтмей къалгъан отдады. Жел аз ургъанлай, кырдык терк окъуна къабынып къалады. Андан а ол адамла жашагъан, ишлеген жерлеге дери жетерге боллукъду. 

   Бюгюнлюкде Къабарты-Малкъарда агъачда от этерге эркинлик жокъду.  Аны бузгъанлагъа тазир салынырыкъды эм ала административ жууапха тартыллыкъдыла.

Алай бла къургъакъ хансны кюйдюрюп, къоркъуусузлукъгъа заран салгъанла да административ жууапха тартыладыла. Дагъыда ала тазир тёлерге да борчлу боллукъдула. Гражданлагъа ол 10-20 минг сомду. Организацияланы бла предприятияланы таматаларына - 30-60 минг, энчи предпринимательлеге тазирни ёлчеми 60-80 мингнге жетеди. Юридический организацияла уа 400-800 минг сом тёлерге борчлу боллукъдула, аманлыкъ ишлери тохташдырылса.

Аны бла бирге уа адамла ачыргъа да къоркъуу сакъланады, деп белгилейдиле РФ-ни МЧС-ини КъМР-де Баш управлениясыны пресс-службасында.