Жангыртыу ишле къыстау барадыла

Бу кюнледе республиканы жол фонду бёлген ахчагъа   «Вольный Ауул - Хасания - Герпегеж - Къашхатау» жолгъа тынгылы ремонт этиле турады. Аны чеклеринде Хасанияны ара Атто улу орамыны 3,9 километр чакълы бири жангыртыллыкъды. Объект элчилеге эм башхалагъа да болмагъанча  магъаналыды. Кюн сайын аны бла аслам машина жюрюйдю. Аны бла бирге шахарны 2-чи номерли больницасы, амбулатория, Маданият юй, межгит дегенча социал учрежденияла да орналадыла.

Бусагъатда подряд организацияны келечилери жолну мурдорун кючлеп, хазырлап кюрешедиле, ызы бла эки къат асфальт саллыкъдыла.  Аны бла бирге жардан таш, топуракъ оюлмазча, бетондан къабыргъала къуядыла,  бордюрла, тротуарла саладыла эм башха жумушланы да тамамлайдыла.  
Ишлени кезиуюнде таза эм кир суу баргъан быргъыла тартыллыкъдыла, ауур жюклю машиналагъа тёзерча  жолну мурдорун кючлерикдиле,   жауун суу саркъырча арыкъла, быргъыла, бордюрла эм тротуарла да жарашдырыллыкъдыла.  

Къоркъуусузлукъгъа да аслам эс буруллукъду, ол санда темирден  буруула тартыллыкъдыла, жорукъну билдирген белгиле, ызла да жарашдырыллыкъдыла.    Андан сора да, машинала сюелирча жерле, «зебрала» эм Т.7. светофорла да орнатыллыкъдыла.

Планнга кёре объект быйыл кюз артыны ахырына битерге керекди.