Эки районубуз да алчыланы санында

«Республикабыздан эки район гитче шахарлада бла тарых тийреледе ырахат болумну къурау жаны бла бек иги проектлени битеуроссей конкурсуна къатышхандыла эмда хорлагъандыла. Ала Майский эмда Чегем шахарладыла. Конкурс «Жашау журтла эмда шахарда болум» миллет проектлени чеклеринде бардырылгъанды,- деп жазгъанды КъМР-ни Башчысы Казбек Коков телеграм-каналында.

 Былтыр бу конкурсда Урван муниципал район хорлагъанды. Нарткъаланы шахар паркын тапландырыуну проекти бек игиледен бирине саналгъанды эмда шёндю толтурула турады.

  Андан алгъа уа Бахсан бла Чегем муниципал районла хорлагъандыла. Аны хайырындан Бахсанда Мамырлыкъны, маданиятны  солуу паркы къуралгъанды, Чегемде уа - Чегем парк.

  Быйыл да сайланнган проектлени жашауда бардырыугъа иги кесек ахча бёлюнюрюкдю. Проект, Президентибиз Владимир Путин айтханыча, магъаналы болуп барады. Регионла анга эки мингден артыкъ заявка бергендиле».