Къошакъ тёлеулеге кимле эркиндиле

Бюгюнлюкде Къабарты-Малкъарда жыл санлары 80 жылдан атлагъан 20 300 адам жашайдыла, деп билдиреди Россейни Социал  фондуну регионда бёлюмюню пресс-службасы.  Бу къауумгъа Къыралда  талай  къошакъ болушлукъ этиледи. Алай бла пенсияны  страховой кесегини тохташдырылгъан ёлчеми ёседи. Аны ючюн энчи документ неда заявление бла келир кереклиси жокъду.

Пенсияны тохташдырылгъан кесеги гражданланы ишчи стажлары, иш хакълары бла да байламлы тюйюлдю. Ол къартлыкъ ючюн тёленеди. Сёз ючюн, 2023 жылда 80 жыллары толгъанланы пенсияларыны страховой кесеклерине  7567 сом къошулгъанды. Алай бла, эки кереге ёсгени  15 134 сом чакълы болады. Бу ахчаны пенсиячы 80 жылы толгъанлай экинчи айдан алып тебирейди.

 Алай ол  социал  неда инвалид болгъаны бла байламлы пенсия алгъанлагъа берилмейди. Дагъыда закон бла баш иелерин тас этгенлери ючюн пенсия алгъанлагъа да бу ахча тохташдырылмагъанды.

Биринчи группалы сакъатлагъа окъуна быллай тюрлю тёлеу этилмейди, нек дегенде аланы пенсиялары къошакъла бла бериледиле.

Жыл санлары 80-нге жетгенлеге дагъыда алагъа къарарча адамны бегитирге болады. Ол жумушха деп къырал ай сайын 1200 сом  тёлерикди. Ол  да пенсия бла бирге ётдюрюллюкдю.  Къарагъан адамгъа ол ахчаны пенсиячы сюйсе берирге, сюймесе уа бермезге эркинди. 

Бу компенсацияны алыргъа сюйгенле «Госуслуги» портал бла неда  МФЦ-гъа барып заявление берирге керекдиле.