Ахыр он жылда уллу эм артыкъда уллу аманлыкъланы саны иги да азайтылгъанды

Россейде мурдарлыкъ  эмда адамны ёлтюрюрге умут этиу дегенча аманлыкъланы  тинтиу эм ачыкълау  алгъын болмагъанча даражагъа жетгенди. Россейде криминал болумну эсеплери ич ишле органла бузукълукъланы контрольда тутханларына шагъатлыкъ этедиле. Аны юсюнден Россейни МВД-сыны келечиси Ирина Волк айтханды.

КъМР-де Ич ишле министерствону пресс-службасындан бизге билдиргенлерича, Ирина Волк полициячыла къыралны инсанларыны законлу сейирлерин бла эркинликлерин сакълау, право низамны кючлеу, аманлыкъланы тохтатыу эм тинтиу жаны бла    борчларын бийик даражада толтургъанларын белгилегенди.

Ол ачыкъ этген тарихлеге кёре, 2023 жылны биринчи жарымында, былтырны бу кезиую бла тенглешдиргенде, аманлыкъланы саны 2 процентге азайгъандыла. Ол санда мурдарлыкъла эм адамны ёлтюрюрге кюрешиуле 2,1 процентге, билип, адамны саулугъуна ауур заран салыу 5,2 процентге, артыкълыкъ этиу 9,6 процентге азайгъандыла.

 Аны бла бирге мюлк бла байламлы бузукълукъланы саны да тюшгенди: талауурла 11,7 процентге, уручулукъла 17,6 процентге, ол санда машиналаны урлау 25,2 процентге, юйледе, фатарлада инсанланы мюлклерин урлаула 28,5 процентге. Сауутланы, окъланы, чачдырыучу затланы эмда алагъа ушашдырылгъан затланы хайырланып этилген аманлыкъла уа 4,3 процентге азайтылгъандыла.

- Ич ишле органланы къуллукъчулары аманлыкъланы тинтиу эм ачыкълау борчларын бийик профессионал даражада толтургъанлары, ол санда ауур бузукълукъланы да, хайыр келтиргенди. Сёзге, мурдарлыкъланы, адамны ёлтюрюрге кюрешген кезиулени 99 проценти ачыкъланнгандыла. Ол а тарыхда биринчи кере болгъанды. Бюгюнлюкде къыралда адамны саулугъуна билип ауур заран салыу бла байламлы аманлыкъланы 90 проценти тинтилип, ахырына жетдирилгендиле,-дегенди Ирина Волк.

Жамауат аслам жыйылгъан жерледе этилген аманлыкъланы саны да 8,3 процентге азайгъандыла. Шёндюгю технологияланы хайырланып этилген аманлыкъланы ачыкълау баш магъаналы жумушладан бири болгъанлай къалады. Аланы саны 27,9 процентге кёбейгенин белгилегенди Россейни МВД-сыны келечиси.  Бу аманлыкъланы тохтатыр мурат бла ич ишле органлада шёндюгю технологияладан билимлери болгъан инсанладан энчи бёлюмле къураугъа энчи эс бурулады.

Акъылбалыкъ болмагъанланы арасында ангылатыу жумушла андан ары бардырыладыла. Сабийле неда аланы къатышыулары бла этилген аманлыкъланы саны 7,7 процентге азайтылгъанды. Аны бла бирге сабийлени эркинликлерин бузуу бла байламлы криминал ишле да 8,6 процентге тюшюрюлгендиле.

 Наркотиклени законсуз сатыу-алыу да уллу аманлыкъладан бири болгъанлай къалады. Былтырны биринчи жарымы бла тенглешдиргенде, бу жаны бла аманлыкъла 11,2 процентге аслам ачыкъланнгандыла. Законсуз сатыу-алыудан полициячыла 12,5 тонна наркотик эм психотроп зат сыйыргъандыла.

 Жоллада къоркъуусузлукъну жалчытыу жаны бла мадарла да хайырлы болгъанларын айтханды Ирина Волк. Кеф водительле этген аварияланы саны 21,6 процентге, алада ауушханланы 37 процентге, жаралы болгъанланы да 19,4 процентге азайтылгъандыла.

- Россейни инсанларыны къоркъуусузлукълары, законлу сейирлери сакъланнганларына кёре ахыр он жылда иги жанына тюрлениуле бардыла. Бу жыллада къыралда эсепге алыннган аманлыкъла 10,9 процентге азайгъандыла. Аны бла бирге мурдарлыкъла, адамны ёлтюрюрге хазырланыула 38,3 процентге аз болгъандыла. Адамны саулугъуна билип ауур заран салыула да эки кереге азайгъандыла. Акъылбалыкъ болмагъанланы арасында аманлыкъчылыкъ он жылны ичинде эки кереге къысхартылгъандыла,-деп билдиргенди Ирина Волк эмда РФ-ни ич ишле органлары, право низамны сакълаучу башха ведомствола бла бирге жамауат къоркъуусузлукъну бла тынчлыкъны андан ары да сакъларыкъларын шарт белгилегенди.

Тикаланы Фатима хазырлагъанды.