Танг кесек соруугъа къаралгъанды

Къабарты-Малкъарны Регионнга оноу этиу арасы (ЦУР)  бир ыйыкъгъа тёрт жюзден аслам соруугъа къарагъанды. Аланы асламысы «Telegram», «Однаклассники», «ВКонтакте» социал сетьледе кётюрюлген «Инцидент Менеджмент» системаны амалы бла жарашдырылгъан проблемаладыла.  

Сагъынылгъан сорууланы кёбюсю, хар замандача, социал къоруулау, жашау журт-коммунал мюлк, тийрени игилендириу, жолланы тапландырыу, саулукъ сакълау эм башха соруула бла байламлыдыла. Аланы хар бирине  специалистле тынгылы къарап, профильлерине кёре тийишли ведомстволагъа билдиредиле.

Тарыгъыуланы кёбюсю Нальчик бла Прохладный шахар округлада эм Чегем муниципал районлада жашагъанладан келгенди.  Алгъа заманда жууап берилирча бир сагъат сакъларгъа тюшгени кёплеге тап болмагъанды. Энди уа, орта эсеп бла алып айтханда, отуз юч минутдан кёпге созулмагъаны ишни бютюн жетишимли бардырыргъа онг тапдырады.  

Жети кюнню ичинде специалистле жууаплы ведомствола бла бирге  Терек шахарны Мальбахов,  Баксанёнокда  Тутов эм Урванда  Кафоевлени атын жюрютген орамлада  жашагъанланы таза суу бла жалчытырча мадар этгендиле.   
Андан сора да, Бахсан шахар округну бир къауум  жеринде кече иги  жарытырча  онг къуралгъанды.  Анга кёре  46 чыракъны  светодиод тюрлюлерине алышхандыла эм элли метрде ток баргъан чыбыкъланы жангыртхандыла.  Нартанда да 1420 адамны суу бла жалчытхан  эки насос станциягъа къаралгъандан сора,   сылтаусуз ишлерча  болгъандыла. 

Эсге сала айтсакъ, Регионнга оноу этиу ара офис халда ишлемейди, «Инцидент менеджмент» бир тюрлю соруугъа  эс бурурча ол социал сетьлени биринде жазылыргъа керекди. Ол санда проблема тынгылыракъ ачыкъланса игиди.