Таза сууну нек тыяргъа боллукъдула?

Адамланы юйлерине келген таза сууну бирде соргъан-сурагъан да этмей тыяргъа боллукъдула. Алай болса, не этерге кереклисин КъМР-ни Тарифле эмда жашау журтлагъа надзор этиу жаны бла къырал комитетинде ангылатадыла.

Суу бла жалчытыучу компания план бла белгиленнген ремонт ишлени хайырланыучулагъа аллындан окъуна билдирмей бардырыргъа эркин тюйюлдю. Кёп фатарлы юйледе жашагъанлагъа, аны аллында билдириу къагъыт тагъаргъа керекдиле. Алай этилсе, адамланы аш хазырларча неда абери жууарча суу алып къояргъа заманлары боллукъду.

Болмагъан борчла ючюн сууну тыяргъа жарамайды. Адамны тёлериги бар эсе уа, аны юсюнден эмда борчну жабарча неллай бир заман къалгъанын да билдирирге керекдиле организациядан.

Бир бек уллу сылтау болмай, сууну тыяргъа неда аны басымын азайтыргъа жарамайды. Бу жаны бла не тюрлю тыйгъыч болса да, адамла аны юсюнден билирге эркиндиле.

Кезиулю ремонт ишлени энчи жоругъу барды. Аланы тындыргъандан сора суу бла олсагъат жалчытып башларгъа тийишлиди. Ол кёп заманны келмей турса уа? Анга юйню жумушларына къарагъан управляющий компанияды жууаплы. Система ишлеп башлагъандан сора, ол сууну тыяргъа эркин тюйюлдю. Сууукъ суу жокъ эсе, Водоканалгъа, сагъынылгъан компаниягъа неда ТСЖ-гъа сёлеширге боллукъду.