Къармашханлагъа - ахча себеплик

Быйыл Къабарты-Малкъардан онсегиз фермер конкурс айырыуну жетишимли ётюп, «Агростартап» грантла къоллу болгъандыла. Ахчаны ала кеслерини эл мюлк бизнеслерин айнытыугъа къоратыргъа боллукъдула, деп билдиргендиле республиканы Эл мюлк министерствосундан.

Болушлукъ бериуню жорукъларына тийишлиликде, фермерлени къоранчларыны 90 процентге дери кесегин жабаргъа боллукъду къырал. Бериллик ахчаны ёлчеми 3,991 миллион сом бла чекленеди. Битеу да 55,8 миллион сом бёлюннгенди. Предпринимательле аны сют малчылыкъгъа эмда тахта кёгетле ёсдюрюуге жиберирге боллукъдула.

Ахча къоллу болургъа сюйгенле (КФХ-ла эмда аланы башчылары) эл мюлк продукция чыгъарыу эмда (неда) аны жарашдырыу бла кюрешгенле болургъа керекдиле, кеслери да ишлерин республикада элледе бардырыргъа.

Дагъыда грант алгъан инсан  жангы ишчи жерле къураргъа керек боллукъду. Кеси да аланы эм азындан беш жылны ичинде кетермей турургъа керекди. Эки миллион сомгъа дери болушлукъ алгъан – бир жер, андан кёп ахча къоллу болгъан а эки жер къураргъа борчлуду.

Энтта да бир излем: хар жыл сайын чыгъарылгъан эмда сатылгъан продукцияны ёлчеми аны аллында жылныкъындан эм азындан он процентге кёп болургъа керекди.

Берилген ахчаны 18 айны ичинде къоратып бошаргъа тийишлиди. Анга сатып алыннган ырысхыны уа жаланда мюлкню айнытыугъа хайырланыргъа жарайды.

«Агростартап» ахча конкурс халда юлешинеди. Быйыл КъМР-ни Эл мюлк министерствосуна аны бла байламлы 156 заявка берилген эди.

Къыралдан болушлукъ «Гитче эмда орта бизнесни субъектлерин тирилтиу» деген регион проектни чеклеринде бериледи. Ол а «Гитче эмда орта бизнес, сора дагъыда энчи предпринимательство башламчылыкълагъа себеплик этиу» миллет проектге киреди.