Ырхы тозуратхан жолланы тапландыргъандыла

Алгъаракъалада сакъ жауунланы хатасындан,  бирси  тау эллегеча,  Жанхотиягъа  да табийгъатны кюйсюзлюгюн сынаргъа тюшгенди.  Аны бла байламлы  КъМР-ни Башчысы  Казбек Коков, Транспорт эмда жол мюлк министр Аслан Дышеков эм  районну администрациясыны башчысы Артур Балкизов бла бирге  жеринде болуп, болум бла шагъырейленнгендиле.

Ызы бла Казбек Валерьевични  буйругъу бла республиканы Транспорт эмда жол мюлк министерствосу    къысха заманда элни  Октябрьская, Молодёжная, Тырныауузская эм  Пролетарская орамларын игилендирирча мадар этгенди. 

Алай бла ишлени кезиуюнде беш энчи техниканы кючю бла 1100 метр чакълы жол таш бла топуракъдан тазаланнганды эм автомобильле чырмаусуз жюрюрча болгъанды.

Мындан арысында ырхы келирге ёч жерледе энчи арыкъла салынсала иги боллугъу да сагъынылгъанды.