Осал къылыкъгъа къажау бирча сюелирге

Бу кюнледе наркотиклени  законсуз хайырланыугъа къажау кюрешни чеклеринде «Таза къабыргъала» деген  акция бардырылгъанды.  Ол  Нальчикде «Къоз терекле» бахчада Ата журт ючюн жанларын берген комсомолчулагъа ишленнген эсгертмени аллында майданда ётгенди.  

Анга  къырал  эмда толтуруучу власть органланы,  Кёп тюрлю жумушла тамамлагъан жаш тёлю араны, КъМР-ни Волонтёрлукъну айнытыу жаны бла  ресурс арасыны, республиканы Саулукъ сакълау министерствосуну «Жамауатны саулугъун сакълау, алгъадан мадарла этиу, медицина  аналитика эмда  информация технологияланы арасыны»,  «М Драйв»,  «Точка опоры» жамауат биригиулени келечилери, студентле, спортчула, волонтёрла да къатышхандыла. 

Келгенлеге ыразылыгъын билдирип, КъМР-ни жаш тёлюню ишлери жаны бла министрини орунбасары  Ахметланы Артур сёлешгенди.

– Арт заманлада наркотиклени хаталарыны юсюнден кёп айтылады. Бу битеу дунияны да тынгысыз этдирген жарсыуду. Жыл сайын Россейде  наркотикледен  30 000 адам  ёледи, аланы 70 проценти уа жаш адамладыла, наркотикле бла байламлы этилген осал ишле да  кёпден-кёп болуп барадыла. Ол ууну жайылыууна къажау сюелиу барыбызны да борчубузду. Ол кюреш къыйматлы болур ючюн кючюбюзню бирикдирирге, не къадар кёп  жаш адамны  спортха тартыргъа, ала бош заманларын хайырлы ётдюрюрча этерге керекбиз, – дегенди ол.

Врач-нарколог, «Жамауатны саулугъун сакълау, алгъадан мадарла этиу, медицина  аналитика эмда  информация технологияла араны»  бёлюмюню таматасы Анзор Лобжанидзе уа быллай шартла келтиргенди: «Бюгюнлюкде Россейде  эсепде 460 минг наркоман турады, алай, саулай алгъанда, ала  алты миллиондан асламдыла. Аланы 20 проценти школчуладыла, дагъыда 20 проценти  20-40-жыллыкъладыла. Ала тёрт миллион чакълы бирдиле. Бир кере окъуна наркотиклени хайырланнганланы саны уа  18 миллионду. Наркотиклеге къажау кюрешиу жаны бла федерал службаны билдириулерине кёре, жыл сайын РФ-да наркотиклени  80 минг жаш бла къыз хайырланады, аллай бири да дуниядан кетеди».

Ол  КъМР-ни Жаш тёлюню ишлери жаны бла министерствосуна, спортчулагъа бла тренерлеге да алагъа хар жаны бла да себеплик этгенлери ючюн ыразылыгъын билдиргенди. 

«Точка опоры»  жамауат биригиуню башчысы Ратмир Каров а  жаш адамланы  саулукълу жашауну сайларгъа, спорт бла кюреширге чакъыргъанды. «Адамгъа саулукъдан уллу байлыкъ жокъду, аны жаш замандан окъуна  сакъларгъа керекди. Наркотикле, аллай башха уула да саулукъну бузадыла.  Бек аманы уа – наркоманланы кеслерине не къадар кёп жашны бла къызны къошаргъа кюрешгенлериди. Бизни борчубуз – ол затны жолун кесиудю»,– дегенди ол.

Андан сора келгенле, къауумлагъа юлешинип, волонтёрла эмда КъМР-де Ич ишле министерствода къуллукъ этгенле  бла бирге  Нальчикни орамларына атланнгандыла. Ала  юйлени къабыргъаларында наркотиклени къайда табаргъа боллугъун билдирген жазыуланы табып, аланы къырып кетерликдиле. 

Ол кюн киберпатруль диспетчер пункт да  ишлегенди, ары ким да  жазыуланы эмда  ала боялгъандан сора суратланы да жиберирге боллукъ эди.                
Ахырында уа Къоз терек бахчаны жаяу жолларындан биринде «Спорт дозор» деген ат бла билим-спорт оюн бардырылгъанды.