Таулу Къабарты-Малкъар

Черек район жолсуз жолла бла барыуну «Таулу Къабарты-Малкъар» деген маршрутха къошулгъанды.

Аны къурауну  ишчи комиссиясыны къаууму маршрут барлыкъ жолланы, майданланы  тапландырыуну амалларына къарагъанды.

КъМР-ни курортла эмда туризм жаны бла министрини орунбасары  Асланбий Шхагапсоев, Черек районну администрациясыны башчысы Къулбайланы Алан, дагъыда башха жууаплы адамла да, маршрут барлыкъ эки жерге жетип, алагъа  къарагъандыла. Ол маршрут Ташлы-Тала элден башланып Огъары Малкъаргъа дери Хазни эмда Сукан ауушланы юсю  бла ётюп барадыла. Комиссияны къауумуна киргенле аланы кёргендиле.  «Бу жол бизни бла маршрутха  КъМР-ни Дизайнерлерини ассоциациясыны келечилери режиссёр-видеограф  да келгендиле. Ала бу жерлеге башха, профессионал  кёзден къарайдыла, болсада не къадар кёп кёз къарап, кесини оюмун айтса да, аллай бир ол игиди. Нек дегенде кёпле кеслерини кёп тюрлю оюмларын айтадыла, аланы араларындан  эм хайырлылары сайланадыла»,-  дегенди  Асланбий Шхагапсоев.

«Бюгюнлюкге эки ауушдан да къарап кёрюрча тёрт жерни сайлагъанбыз,-дегенди  Къулбай улу.  Бизни аллыбызда уллу борч сюеледи. Черек районну юсю бла тёрт аууш жолла барадыла.  Мындан ары да ол жаны бла  ишлерикбиз». Жерлени белгилегенден сора, дизайнерле  аланы тапландырыуну  къолгъа аллыкъдыла.