Кёп фатарлы юйде битеулю жумушла деген ол неди эмда аны ючюн тёлеуле къалай бериледиле

Кёп фатарлы юйде жашагъанла кеслери хайырланнган коммунал жумушладан сора журтну кереклерине этилген къоранчланы къалай тёлейдиле деп, кёпле сорадыла. Аны КъМР-ни Энергетика, тарифле эмда жашау журтлагъа надзор этиу министерствосунда былай ангылатадыла.

Бу тёлеулеге не киреди?

Электрокючге къоранчла:

- подъездлени жарытыу;

- домофонну ишлетиу;

- лифтлени ток бла жалчытыу;

- видеокамераланы, суу насосланы (ала бар эселе), жылытыучу оборудованияны автоматика халда ишлетиу системаланы жалчытыу.

Таза эмда исси суу бла байламлы къоранчла:

- тапкаланы, кир-кипчикни энишге тюшюрген быргъыланы тазалау;

- къыртышлагъа, гюлле ёсген жерлеге суу сугъарыу;

- коммуникация сетьлени тазалау;

- жылыу бла жалчытыугъа хазырланнганда тийишли сетьлени тап халгъа келтириу;

- юйню ичинде суу быргъылада башха къоранчла.

Тёлеулени азайтыр амалла

Бек игиси - хар фатарда да битеу коммунал къоранчланы тергеген приборла болуп, ала кёргюзтген эсеплени тийишли организациялагъа хар ай сайын заманында билдирип турууду. Аланы орнатханлай, ол шарт тергеу системагъа тюшер ючюн, аны юсюнден ЖЭУ-ге билдирирге керекди.

Электрокючню юсюнден айтханда да, прибор кёргюзтгенни сагъынылгъан организациягъа заманында билдирирге тийишлиди. Дагъыда къоншула неда башхала ток сетьге эркинликсиз къошулмазына кёз-къулакъ болургъа керекди.

Эски ток ызла алышындырылсала, подъездледе чыракъланы светодиод тюрлюлери салынсала, ол да къоранчланы азайтыргъа себеплик этерикди.

Эсеплеучю приборлары болмагъанла сууну аяргъа кюрешмейдиле, аны белгиленнген мардасындан артыкъ хайырланадыла. Анга уа тийишлисича ишлемеген сантехника да къошулса уа, бютюн уллу къоранчла этерге тюшеди.

Фатарда бир адам да жашамай эсе уа?..

Юйню битеулю жумушлары ючюн къоранчла фатарда адамны тургъаны неда къалгъаны бла байламлы тюйюлдюле. Ол себепден аны иеси быллай  тёлеуден эркин этилмейди. Анда бир кезиуню киши жашамай турса да.

Эсеплеген прибору болгъан юйде биреулен коммунал жумушла ючюн хакъ тёлемей турса, аны ючюн ахчаны башхаламы берликдиле?

Ол тюз хапар тюйюлдю. Фатарда быллай прибор болмаса, хайырланылгъан ресурсну багъасы норматив бла тергеледи. Ол а юйню кесини прибору кёргюзтгенден кетериледи. Фатарда прибор бар эсе уа, башында айтылгъаныча, ол кёргюзтгенни заманында билдирип турургъа тийишлиди.

Юйню битеулю жумушлары жашау журт жумушлагъа киремидиле?

«Россей Федерацияны жашау журтла бла байламлы кодексине бла Россей Федерацияны бир-бир законодательный актларына тюзетиуле кийириуню юсюнден» законну онекинчи статьясына талай жыл алгъа тюрлениуле кийирилгендиле. Алай бла юйню битеулю жумушлары ючюн тёлеуле «коммунал» дегенден  «жашау журт жумушла» дегеннге кёчюрюледиле. Аны хайырындан битеу юйде этилген къоранчланы адамланы боюнларына салыудан къутулургъа боллукъду. Управляющий компанияла да ресурсланы аяргъа, аланы урлаугъа къажау мадарла этерге кюреширикдиле. Нек дегенде сагъынылгъан къоранчла белгиленнген мардасындан артыкъ болсала, аны ала кеслери тёлерикдиле.