Игини аты иги бла айтылыр

 Иги таныгъан, сюйген адамынгы юсюнден озгъан заманда айтхан бек къыйынды.  Герюгланы Азнауур манга ма аллай адам болгъанды. Къарачай-малкъар миллетде халкъны жумушларын эте айланнганланы  арасында аны  танымагъан хазна болмаз эди. Ол ортада  «кёпюрле» ишлегенледен эди.  Малкъардан Къарачайгъа баргъан адам Азнауурну сурамай къоймагъанды. Ол къонакъбайлыкъ этерге сюйген, сый бере эмда ала  билген огъурлу адам болгъанды. Аны ючюндю бюгюн  аны юсюнден кёп ариу айтылгъаны да.

«Минги-Тау» журналны баш редактору Додуланы Аскер Герюг улуну юсюнден айта, ол таза ниетли, айтхан сёзюнде кертичилей тургъан  адам болгъанын чертгенди. «Не уллу жумушну да базынып алып къойгъан, аны ахырына дери элтген аллай инсан эди. Бир заманда кесине иш сурап чыкъмагъанды, иш аны кеси табып тургъанды. Азнауур кёп жылланы ара шахар Москвада ишлегенди, ол заманда да миллетиме, жууугъума, къаршыма деген дыгаласны бир заманда унутмагъанды. Аллына келгеннге болушмай иймегенди. Аллайла уа аслам болгъандыла. « Заманны адамы» дейдиле аллайлагъа», -дегенди Аскер.

Жашау тюрленнгенде, Азнауурну Москвадан Къарачай-Черкесге тилеп чакъырадыла.  Ол къарачай халкъны миллет маданиятыны президентине айырылады.  Кёп жылланы Къарачай- Черкес  Республиканы Парламентини депутаты болуп да  тургъанды. Къайда ишлесе да, миллетине  къуллукъ этгенди. Ол кезиуде  оюла тургъан кёп жумушну     ёрге  къалайды. Не уллу трибунадан да аны жарсытхан, сагъышландыргъан сорууланы кётюрюп къойгъан болмаса, сансыз кёз бла  къарамагъанды. Жаланда Къарачайда угъай, малкъар миллетге да болушханды.

Маданият жаны бла кёплени ишлери тозурап тургъан кезиуде, Азнауур  жырчылагъа, тепсеу къауумлагъа, жазыучулагъа да  ачха болушлукъ этгенди, бирде кеси хуржунундан чыгъаргъанды, бирде къыралдан бердиргенди. «Ол эр кишилени чынтты шуёхлукъларын багъалай билгенди, керек заманда алай болгъанды, сёзю, иши бла да болушханды, бир заманда да кёлсюзлюк этмегенди, кесин таза къарачайлы кишича жюрюте билгенди. Герюг улуча адамла алай кёп чыкъмайдыла, деп да бошдан айта болмаз эдиле»,- дегенди дагъыда Додуланы Аскер.

«Къарачай» газетни баш редактору Ёзденланы Альберт а былай дегенди: Азнауур бек бай адамладан бири болгъанды. Бир къауумлача, ачхасын хуржунуна салып къоймай, миллетиме не бла жарайым,  не игилик этейим деген адам болгъанды. Спортда болсун, илмуда , культура да болсун, миллетни бетин чыгъаргъан затлада ол кесин аямагъанды. Ол кеси чакъырып, айтып кёплеге болушханды. Адамла кеслери тилеп келген жумушланы тындыргъаны уа  санап да бошаялмабыз.  Ол кеси ючюн жашамагъанды,  миллети ючюн жашагъан адам болгъанды.  Таза къарачай къаны аны ишге берилгенинде да кёрюнюучю эди. 

Малны бек сюйгенди, аны себепли уллу кёл тутуп, аны тёгерегинде малла жайып,  таза къарачайлыча , ата-бабаларындан келген иш бла кюрешип,керегин табып, пенсиягъа кетгенден сора да адамлагъа болушханы таркъаймай эди. Миллетге байракълыкъ, билеклик этген, аны ызындан къалгъанла ёхтемленип , Азнауурну къауумунданбыз , деп айтырча кесини атын тарыхда алай къойгъанды, андан туугъанладан туугъанла да  айтырча».

Азнауурну  иги таныгъан журналист Ахкёбекланы Элдар да Герюг улу кертиси бла да тауушлукъ адам болгъанын эсгереди. «Менсинмеген , ишден арый-тала билмеген керти адам эди. Хар кимге да игилик излегенди, тёгерегиндегилени сюйгенди. Аны бла шагъырей болургъа, шуёхлукъ жюрютюрге,  аллай билимли, эсли, хурметли, огъурлу адам бла тюбеше, сёлеше турургъа онг берген уллу Аллахха ыразыма», - дейди.
Азнаур Нальчикге келсе,  жюз жылдан атлагъан Габоланы Асланнга барыргъа бек сюйюучю эди. Ала экиси да ёмюрден бери да  бир-бирни танып тургъанча, къаршы жууукълача ушакъ бардырыучу эдиле.  «Атам ёлгенди, алай мен Асланнга келсем, атама келгенча болама», - деучю эди.

Азнауурну дуниясын алышханын эшитгенинде, Аслан бек жарсыгъанды, бушуу этгенди . Ызы бла уа «Биз алыкъа ангыламайбыз, арабыздан эки миллетни да бусагъатда жашаргъа керекли  къаллай керти адамыбыз кетгенин», - дегенди.
Азнауур барыбызны да кёз туурабызда эди. Сыфаты ариуча, ич дуниясы да ариу  къарындашыбызны  ёхтем бла сагъынабыз. Бир заманда да унутулмазлыкъ инсаныбызды. Адам эсде къалады огъурлулугъу бла, халаллыгъы бла, этген ишлери бла. Азнауурну да ол затлары эсибизде къаллыкъдыла.  Ол  дуниясын алышхан эсе  да,аны юйю, къонакъбайлыгъы, халаллыгъы унутуллукъ тюйюлдю. Игини аты ахшы ишлери бла айтылгъанлай турады. Ма аллай адам эди Герюг улу Азнауур.