Социал туризм айнытыллыкъды

2023 жылда Къабарты-Малкъарда социал туризмни айнытыргъа белгиленеди, деп билдиредиле республиканы Курортла эм туризм министерствосундан.

Анга кёре акъылбалыкъ болмагъанланы ишлери бла комиссияда эсепге алыннган ёксюз эм ата-аналары къарамай къойгъан 7-14-жыллыкъ сабийлени солууларын къураргъа белгиленеди. Былтыр аллай 300-ден аслам сабийни жумушуна къаралгъанды. Туроператорла алагъа 15 жолоучулукъ къурагъандыла, аны хайырындан жаш адамла республикабызны табийгъат, тарых эм архитектура жаны бла белгили жерлерин кёргендиле. Былтыр ол ишлеге 500 мингден аслам ахча бёлюннгеди, кёрюмдюле иги болгъанлары ючюн а быйыл финансированияны кёбейтгендиле. Сора, Къабарты-Малкъар СКФО-да проектге къатышхан туроператорлагъа къоранчларыны 95 процентин къайтаргъан жангыз регионду.

Быйыл анга субсидияла бериуде тюрлениуле да этилгендиле. Проектге къатышыргъа заявканы энди Бир федерал реестрде болгъан организацияладан сора да, юридический лицола, адамла бла энчи предпринимательле да бераллыкъдыла. Конкурс алгъа жылгъа бир кере бардырылгъанды, бусагъатда уа – хар юч айдан. Сабийлени оюмлары да эсге алынады, быйыл алагъа къыйын жашау болумгъа тюшген юйюрледе ёсгенле да къошуллукъдула.