Грант болушлукъгъа ачылгъан биринчи объектде - тинтиуле

Нальчикде туризмни айнытыугъа берилген грант болушлукъну чегинде ишленнген биринчи объектге энчи комиссия баргъанды, ол анда оборудованияны качествосуна, белгиленнген жумушла къалай толтурулгъанларына къарагъанды, деп билдиредиле республиканы Курортла эм туризм министерствосуну пресс-службасындан.

Объект «Шагди» ат-спорт клубну жеринде ишленнгенди. Планнга кёре, ары демонстрация манежни орнатырча керекле, спорт эришиулени (джигитовка, чариш, конкур эм башхала) бардырырча къараучулагъа шинтикле алыннгандыла. Бу мадарла клубха, кюнню халына къарамай, жыл узуну тюрлю-тюрлю мероприятияланы бардырыргъа онг берликдиле, аланы уа айгъа бир ненчасын къураргъа умут барды. Трибуналада да 274 адамны сыйындырыргъа жарарыкъды. «Биз уллу чаришлени, юйрениулени къураргъа сюе эдик, алай къараучуланы олтуртурча жерле болмагъанларыны хатасындан ол муратыбызны толтуралмагъанбыз, энди аллай чырмау жокъду», - дегенди клубну директору Ирина Фокичева.

Проектге тийишлиликде клубда экскурсияла бардырыргъа, аланы кезиулеринде атланы юслеринден кёп жангы зат билирге, солургъа да боллукъду. Нальчикни тийресинде атлада жолоучулукълагъа кёре аллай программала бюгюнлюкде хазырдыла, андан тышында, атлада кёпкюнлюк экспедицияла къураргъа да белгиленеди. Аланы кезиулеринде уа къонакъла республиканы миллетлерини маданиятлары эм тёрелери бла да шагъырейленирикдиле. Энчи эс сабийлени атлада айланыргъа юйретиуге бёлюнеди, ол санда чекленнген онглары болгъан балала бла ишлеуге да.

Комиссия тинтиулеринден сора эсепле чыгъаргъанды, алагъа кёре проектни толтурууда халатла ачыкъланмагъандыла.