Буюрулгъан жумушну шарайыпсыз толтургъанла

Бюгюнлюкде Быллымны почтасыны жумушун ючеулен толтурадыла. Таматалары Маккаланы Апууду, Жазаланы Татьяна бла Ёзденланы Фатима почтальонладыла. Ала, бир-бирни ангылап, салыннган борчланы тынгылы тамамлайдыла. Мындан алда эллиле бла бардырылгъан тюбешиуюбюзде газет окъуучула  почтачыланы ишлерине ыразылыкъларын кёплери айтхандыла.

Маданият юйге уа Ёзденланы Фатима  келген эди, ушакъны да аны бла бардыргъанбыз. Ол элни почтасында 20 жылдан артыкъ ишлейди. Ары дери  кёп жылланы продснабда бухалтер болуп тургъанды. Шимал-Осетияда экономика эм финансла жаны бла техникумда билим алгъанды. Баш иеси Бузжигит бла эки жаш бла бир къыз ёсдюргендиле. Жашла юйдегили болгъандыла. Аслан Нальчикде, Артур а Санкт-Петербургда жашайдыла. Джамиля «Голубые ели» санаторийде медсестрады.

«Уллу деменгили къыралыбызда тюрлениуле башланнгандан сора, бир кесекден ишсиз къалама, сора почтальонну жери бош болгъанын билип бери келеме. Ал кезиуде бир кесек экили да болгъан эдим,  элни ичинде уллу ауур сумканы да кётюрюп къалай айланырыкъма деп.  Адамла бла   ушакъла этип, пенсияларын берип, аланы  къууаннганлары  хычуун кёрюнюп тебирейди. Кесим  да ишни эбине тюшюнеме, къысхасы, сокъуранмайма бу жумушну тамамлап, былайда тохтагъаныма, эллилеримден, газет окъуучуларымдан ыразылыкъ ала эсем, ол да игиди манга», - дейди бизни бла ушагъында Фатима.

Почтаны ишини эм газетге жазылыуну юсюнден айта, Быллымда шёндю «Заманны» 25 адам алгъанын билдиргенди Фатима. Эллилени бир къаууму «Минги - Тау» журналны, «Эльбрусские новости» район газетни  да сюйюп жаздырадыла, аланы саны бир кесек кёбюрекди, багъалары учуз болгъанлары ючюн болур, дейди ол.  

«Билемисиз, адамлагъа айтып турмасанг, бир-бирле унутуп къоядыла каталогда болгъан изданиялагъа заманында жазылыргъа. Иинаныгъыз, малкъар тилде чыкъгъан газетибизни уа энчи сюедиле. Сагъыш этсек, бир ыйыкъны ичинде окъуна къаллай бир сейирлик материалла басмаланадыла анда.  Эллиле уа бир таныш  не да жууукъ адамларыны суратларын кёрселе, анга къууанып, ёхтемленип билдириучюдюле. Мен да алагъа малкъар тилде чыкъгъан жангыз газетибизни магъанасыны юсюнден эсгертгенлей турама. Сиз миллетни тарыхыны, белгили адамларыбызны, эллерибизни юсюнден статьяланы  къайда окъурукъсуз  «Заман» газетге жазылмасагъыз деп, чертип айтама. Ачыкъ айтайым, ол сёзлени эшитселе, кёпле пенсиябыздан къаллай бир керек эсе да ал, деп ыразылыкъларын билдириучюдюле»,- дейди Фатима.