Тыш къыралладан алыучула излей

Быйыл 13-15 декабрьде Бирлешген Арап Эмиратлада (ОАЭ) Дубай шахарда «Middle East Organic And Natural Product Expo 2022» кёрмюч ётгенди. Ары келгенле органика эмда таза, жалгъан болмагъан ашарыкъланы тюрлюлерине къарагъандыла. Жууукъдагъы Востокда быллай продукцияны кёрмючю жаланда ма буду. Ол бардырылып башланнганлы онжети жыл болады, деп билдиргендиле КъМР-ни Экономиканы айнытыу министерствосундан.

Кёрмюч беш бёлюмден къуралгъан эди: аш-азыкъла эмда суула, саулукъ, ариулукъ, жашау эмда тёгерекдеги къудурет. Бизни республикадан алагъа эки предприятие бла бир энчи предприниматель къатышхандыла. Алагъа бу министерство эмда «Мени бизнесим» деген ара билеклик этгендиле.

Биринчи предприятие - «Живая вода» ООО-ду. Анда «BabugenT» ат бла гара суу чыгъарадыла. Ол бек таза продукциягъа саналады. Производство да ол халда къуралгъанды.

«Нальчик-сладость» кондитер фабрика уа 2004 жылдан бери бардырады ишин. Аны татлы продукциясы таза сырьёден этиледи, кеси да консервантла неда ГМО къошулмай алай. Алыучуланы сейирлерине бек эс бурадыла, не затлагъа сурам бар эсе да, аланы чыгъарыргъа кюрешедиле.

Ючюнчю делегат а, айтханыбызча, энчи предпринимательди – Моллаланы Магомедхан. Ол бал чыгъарыу бла кюрешеди.

Бу кёрмючге къатышыу алагъа хайырлы болгъанды дерчады. Предпринимательле ОАЭ-ни эмда Иранны келечилери бла байламлыкъла къурар умутда ушакъла бардыргъандыла.

Министерствода айтханларыча, быллай кёрмючлеге къатышыугъа тийишли эс бурулады. Бу иш кеси да «Гитче эмда орта предпринимательство, сора дагъыда энчи предпринимательство башламчылыкъгъа себеплик этиу» деген миллет проектни чеклеринде бардырылады.