Жангы жылны байрамларына – 7,7 миллион сом

Къабарты-Малкъарда Жангы жылны байрамларына, ол санда саугъалагъа 7,7 миллион сом бёллюкдюле. Аны юсюнден бизге КъМР-ни урунуу эмда социал къоруулау министри Асанланы Алим билдиргенди.    

Быйыл республикада  Жангы жылны белгилеуге  уллу къоранчла этмезге келишгендиле. Аны орунуна  энчи аскер операция баргъан жерде къуллукъларын толтургъанлагъа бла аланы юйюрлерине  болушлукъ этилликди.  

Аны бла бирге  Жангы жылгъа жораланнган сабий программала – утренникле, байрам назыла эм башха къуунла  бирси  заманладача ётерикдиле.  Ол санда Республикалы назыгъа  бирси жылладача, эм биринчи ёксюзлени, къолайсыз эм къыйын болумгъа тюшген юйюрледен сабийлени чакъырлыкъдыла. Бу жол   Херсон областьдан аскерчилени бла къачхынчыланы сабийлерине аслам эс   буруллукъду.

Алай бла 26-30 декабрьде эм  2-5 январьда  Жангы жылны байрамына атап Нальчикде Къырал концерт залда эм  Музыка театрде жомакълы, музыкалы  шоула ётерикдиле. Аны чеклеринде  конкурсла, викторинала эм чыгъармачылыкъ акцияла боллукъдула.