Айырмалы юйюрлени саугъалагъандыла

Тырныауузда кёп болмай «Жылны юйюрю-2022» деген Битеуроссей конкурсну регион кезиуюнде хорлагъан юйюрлени келечилерин саугъалау ётгенди. Анга Элбрус районну администрациясыны таматасыны къуллугъун толтургъан Сотталаны Къурман къатышханды.

Районну ара маданият юйюнде юлгюлю юйюрлерибизни келечилерине деп къууанчлы ингир къуралгъан эди. Сотталаны Къурман Басхан ауузунда юйюр жашауну ата-бабаларыбыздан келген ашхы тёрелерин сакълагъан, сабийлерин адежликде юйретген юйюрле аз болмагъанларын энчи ёхтемлик бла белгилегенди.  Конкурсда да анга энчи эс бёлюннгенин чертип, ол терскъолчу Ёлмезланы Абдулкеримни бла Земфираны «Юйюр - ахшы тёрелени кюбюрю» деген номинацияда хорлагъанлары бла алгъышлап, саугъалагъанды.

Къайсы юйюрню да байлыгъы сабийледиле да,  «Кёп сабийли юйюр» деген номинацияда уа Джаппуланы Адамейни бла Мадинаны белгилеп, ыспас этгендиле. «Жаш юйюр» деген къауумда уа алчылыкъ Гюлюйланы Солтаннга бла Алимагъа жетгенди.

Саугъаланнганланы атларындан Ёлмезланы Абдулкерим сёлешип, хар бир инсанны да борчу юлгюлю, ариу къылыкълы юйюр ёсдюрюу болгъанын эсгертгенди.

 Сыйлы къонакъланы алларында уа Элбрус районну артистлери жыр айтхандыла, миллет тепсеулерибиз бла къууандыргъандыла.