Битимчиликде эсепле къууандырадыла

Кёп болмай Бахсан муниципал районда агропромышленный комплекс бла байламлы бёлюмню быйылгъа ишин эсеплегендиле.

Эл мюлк, аш-азыкъ эм жер байламлыкъла жаны бла управленияны таматасы Хамидби Каскулов айтханыча, бюгюнлюкде мюлклени барында да мирзеулюк нартюхден сора тирлик жыйылып бошалгъанды. Кюзлюк будай 1839 гектарда ёсдюрюлгенди эм хар гектардан 47 центнер алыннганды. Жазлыкъ будайгъа да 235 гектар жетгенди, аны да хар гектарындан 41 центнер жыйылгъанды. Кюзлюк арпаны да 437 гектрада орулгъанды эм 19879 центнер мирзеу алыннгынды. Жазлыкъ арпа да 1225,1 гектарда ёсдюрюлгенди эм хар гектардан 37 центнер жыйылгъанды. Зынтхы да 142 гектарда кетерилгенди эм хар гектардан 22 центнер жыйылгъанды.

- Бизни аграрчыларыбыз качестволу чеплеу ёсдюрюрге юйреннгендиле. Быйыл ол 5016 гектарда салыннганды эм  хар гектарындан 35 центнер алыннганды. Болсада 10-15 жыл мындан алгъада бир гектардан 20 центнер чыкъса уллу жетишимге санагъаныбыз эсибиздеди. Аны бла бирге жашил къудору да 531 гектарда ёсдюрюлгенди эм бир гетардан 50 центнер чыкъгъанды. Ол бизни мюлклеге болмагъанча ахшы жетишимди. Орта эсеп бла алып айтханда, регионлада аны бир гектарыдан 30-35 центнер аладыла. Нартюхден да бай тирлик къууандырады. Быйыл аны 712 гектарда салгъанбыз эм хар гектардан 190 центнер тирлик алабыз, - деп билдиргенди Хамидби Каскулов.

Сабанлыкъланы асламысы неда 20341,7 гектары хар замандача мирзеулюк нартюхге бёлюннгенди. Жаз башында кюнню болуму къоймагъаны ючюн кезиулю ишлени бардырыргъа иги чырмагъанды. Бусагъатда да жауунланы хатысындан энчи техниканы заманында кийрирча онг болмагъанды. Ол себепден бу кюнледе аны оруп бошарыкъбыз. Бюгюнлюкде хар гектардан мирзеулюк нартюхден 70 центнер чыгъады.  

Сагъынылгъан жетишимле болдурургъа аграрчыла тийишли ишлени заманында этгенлеринденди деп таукел айтырчады. Аны бла бирге ала качестволу урлукъну, минерал семиртгичлени, бюгюннгю агрохимикатланы,  техника эм технологияланы да тири хайырланадыла.

Бюгюнлюкде 2100 гектарда кюзлюк будай эм 500 гектарда арпа чачылгъанды. Эки къауумунда да кёрюмдюле былтырдан иги да уллудула.