Сабийле аскерчилени жангы жылгъы байрамла бла алгъышларыкъдыла

«Единая Россия»  «Жангы жылгъы почта» акцияны башлагъанды. Аны чеклеринде сабийле энчи операциягъа къатышхан аскерчилеге  байрам суратла ишлерикдиле, партия уа аланы фронтха жетдирликди.

 Партияны жамауат приёмныйлеринде эмда «Единая Россияны» болушлукъчуларыны штабларында  сабийлеге суратланы ишлетирге юйретирикдиле, алай открыткаланы хазырлап келтирирге да жарайды.

 - Россейни битеу регионларындан сабийле ата журтубузну къоруулаучуларын алгъышларыкъдыла. Жангы жылны байрамларыны аллында биз аланы аскерчилерибизге элтирикбиз. Жангы жыл – муратла толгъан, жомакълагъа ийнаннган заманды. Ата журтубузну жигит къоруулаучулары сабийле этген саугъалагъа артыкъда къууанырыкъларына ишексизме,-дегенди партияны генсоветини секретарыны орунбасары Анна Кузнецова.

КъМР-ни Парламентини депутаты, партияны регион толтуруу комитетини башчысы Дмитрий Парафилов айтханыча, республика да къошуллукъду бу  жумушлагъа.

- Энчи операция бардырылгъан кезиуде регионла байрам жумушлагъа къоранчланы къысхартадыла. Ол а, сёзсюз, тюз оноуду. Алай аскерчилерибизни саугъалау а артыкъда магъаналыды,-дегенди ол.