Республикагъа келген жолоучуланы саны ёсгенди

Къабарты-Малкъаргъа июль -август айлада келген жолоучуланы саны 60 процентге ёсгенди, деп билдиреди РФ-ни Туризм жаны бла федерал агентствосу. Ал этилген тергеулеге кёре, республикагъа 488,2 адам келгенди. Тёреде болуучусуча сагъынылгъан заман туристлени аслам келген кезиулери болуучуду.

Жолоучуланы асламысы республикагъа Москвадан, Ставрополь крайдан, Москва эм Ростов областьдан эм Шимал-Кавказ федерал округдан келедиле. Белгилерчады, Къабарты-Малкъаргъа жер-жерледен солургъа келгенлени саны ёсе баргъанын.

 Андан сора да жолоучула республикагъа сюйюп келгенлерини баш сылтауларындан бири, аны табийгъат ариулугъуну эм саулукъну кючлеу жаны бла аламат онглары болгъанынданды. Дагъыда алагъа келишген солуу жерледе тохташдырылгъан учуз багъаладыла. «Бюгюнлюкге туристлени къонакъ юйледе эм санаторий-курорт учреждениялада орнатыу биз этген тергеулеге кёре, алада алгъын тохташдырылгъан багъаланы 60 проценти тюрленмегенди эм 40 процентинде уа, ала жаланда 10 процентге кётюрюлгендиле. Канат жоллада багъала уа тургъанынлай къалгъандыла», - дегенди КъМР-ни курортла эм туризм жаны бла министри Мурат Шогенцуков.

 Къонакъла, Къабарты-Малкъаргъа келгенлеге уа  алай къарайдыла, Быллымны тийрелеринде орналгъан кёлге, Нарзанла талагъа, Чегет талагъа бла Азаугъа, Чегем чучхурлагъа, «Чегем» парадромгъа эм Эл-Тюбюне, Чирик кёлге эм Огъары Малкъаргъа барыргъа бек сюедиле. Андан сора да туристле Нальчикни ариу тапландырылгъан орамларында солуп айланыуну жаратадыла.  Шахар паркда, Къабарты орамда, жюнден этилген затла сатылгъан базарда айланыргъа эм кёп тюрлю миллет ашханалада сюйюп олтурадыла.  

 Жолоучулукъ адамланы бир-бирлерине жууукъ этеди. Къабарты-Малкъар Республика уа туризм жаны бла битеу къыралгъа белгили жерди. Алыкъа курорт сезон бошалмагъанды, ол себепден туристлени энтта да Россейни бир ариу жерин ачаргъа онглары барды.

Бизни корр.