Сайлауну созмай этерге тийишлиди

Пенсия фондну регионда бёлюмюнден эсгертгенлерича, социал жумушланы (НСУ) алыргъа эркинликлери болгъан федерал льготникле сайлауларын этерге керекдиле. Законда чертилгенича, ала НСУ-ну неда аны орунуна ахчаны алыргъа боллукъдула. Нени сайлагъанларыны юсюнден заявленияны ала быйыл  1 октябрьге дери жазаргъа тийишлидиле, оноулары экинчи жыл 1 январьдан башлап кючюне кирликди. Заявленияны фондну жер-жерли управлениясында неда жашагъан жерлеринде Кёп функциялы арада толтурургъа жарарыкъды.

Бюгюнлюкде Къабарты-Малкъарда быллай льготаны алыргъа тийишли 17 600-ден аслам адам жашайдыла. Фонддан ангылатханларыча, инсан алгъадан окъуна НСУ-ну орунуна келе тургъан жыллада да ахча алыргъа излегенини юсюнден жазып билдирген эсе, оноуун тюрлендиргинчиге дери аны жангыртыргъа керек тюйюлдю. 2021 жылдан бери аны ёлчеми бир айгъа 1313 сом 64 капекди. Ол былай тергеледи:

         - дарманла бла жалчытыугъа 1011 сом;

         - болгъан аурууланы профилактисын бардырыр ючюн, санатор-курорт багъылыугъа путёвкагъа 156 сом;

         - багъыллыкъ жерине темир жол неда шахарла аралы транспортда барып къайтыугъа 145 сом.

         1-чи къауумда льготникле бла сакъат сабийлеге биргелерине баргъан адамлагъа да аллай онгла бериледиле.

         Сайлауну этмегенле жумушланы кеслери бла хайырланырыкъдыла. Бу тизмеге радиацияны хатасы тийгенле кирмейдиле, алагъа НСУ алгъадан окъуна ахча бла бериледи.

         Соруула бла фондну регион бёлюмюне 8-800-600-01-84 телефон номерге  сёлеширге боллукъду.