Аманлыкъчыланы къапханларына тюшмез ючюн

Аманлыкъчыла адамланы ахчаларын урлауну жангы амалларын тохтаусуз къурайдыла, деп билдиредиле banki.ru сайтда.

Энди ала Россейни Банкындан сёлешгенча этип, адамгъа аны аты бла тыш къыраллы кредит учрежденияда счёт ачылгъанын айтадыла эм анда тургъан ахча ючюн комиссияны тёлеригин тилейдиле. Къыралны ара банкындан ангылатханларыча, алай сёлешгенлеге неда аллай билдириулери бла письмолагъа жууап бермезге, бютюнда уа ахчаны ётдюрмезге, парольланы айтмазгъа керекди. 

Экинчиси, уручула Ара Банкны атындан адамлагъа сатып алгъан дарманлары, медицина приборла, БАД-ла ючюн компенсация бериллигин айтадыла. Арт кезиуде пандемия бла байламлы тёлеуле да этиледиле, дейдиле. Ол ётюрюкдю! Аланы муратлары сизни счётларыгъызгъа данныйлени билиудю. Ара банкдан белгилегенлерича, парольланы сурап сёлешгенле сизге игилик излемейдиле. Ышанып, парольларыгъызны айтханлай, аманлыкъчылагъа счётларыгъызгъа жол ачарыкъсыз.

Ишеклик туудургъан кезиулени юслеринден право сакълаучу органлагъа билдирирге тийишлиди.

Ахчагъыздан къуру къалмазча къаллай сёзлени айтыргъа жарамайды

Эм игиси – аманлыкъчы бла сёлешмей къоюуду. Картагъызда неда счётугъузда этилген операцияланы юслеринден банкла телефон бла сёлешип билдирмеучюдюле.

Болсада, ушакъ башланнган эсе, “да”, “нет” деген сёзлени айтмагъыз, тарихлени санамагъыз. Ала ауазыгъызны диктофоннга жаздырып, артда сизни атыгъыздан биометрия данныйлени хайырланнган кредит учреждениягъа неда башха службагъа сёлеширге боллукъдула.

 Ахчагъыз урланнганды дегенлеге да ышанмагъыз. Банкла, башда чертилгенича, клиентлерине башха-башха неда белгисиз теелфон номерледен ахча операцияла бла байламлы сёлешмейдиле, парольланы айтырларын тилемейдиле. Ала сообщенияларын официал номерледен иедиле, сёлешселе да, аланы хайырланадыла.

Интернетде тургъан кезиуюгюзде ишеклик туудургъан ссылкалагъа кирмегиз.

Асламысында адамла аманлыкъчылагъа абызырап, ахчалары ючюн къоркъуп ийнанадыла. Былайда ашыгъыулукъ этмезге керекди. Эм игиси, ала бла ушакъны тохтатып, банкны официал номерине сёлешсегизди.