Газетибизни узакъ Японияда тансыкълау

«Заман» газетге – 95 жыл 

Газетни  къолума алып, «Багъалы   шуёхла! Сиз,  бир  тюрлю  сылтаула  бла «Заманнга» жазылмай къалгъан эсегиз…» -деген  сёзлени окъусам, анга  бир  тюрлю чурум болмазгъа  керекди, деп  келеди  жюрегиме.  Мен  таулума  деген  ашыгъып сакъларгъа  керекди  аны хар номерин. Олду  бизни  ана сёзюбюзню татыуун чыгъаргъан миллет байлыгъыбыз, тенгликни къаты сакълагъан кенгешчибиз, тилибизни айнытыуда болушлукъчубуз. Къысхасын  айтханда, хар таулу юйюрню  сыйлы къонагъы болургъа керекди ол деп, мен алай  ангылайма. 

«Заман» газет бла шуёхлукъну уа  мен 1963 жылдан бери жюрютеме, битеу къууанчларына къатышыргъа да насыбым  тутхан эди.  Анга 95 жыл болгъанды,  алай  адамланы кесине  тарта,  жангыра  барады.  

Бу жол ол  теманы  эсиме  салгъан  а  эски блокнотларымы  биринде  белгили   таулу прозаик, драматург Токумаланы Жагъафар  бла ушакъ этгенибизни юсюнден этилиннген  жазыуладыла. Ол  манга: «Эгечден туугъан, не айланаса  быллай  кюн,  элде   бахча ишлеге  къарамай  деп,  лакъырда сёзлери   бла   сёлешгенде, мен а: «Газетибизге Уллу  Хорламны Кюнюне  материалчыкъ алып  келген  эдим»,- дейме. 

«Заманмы» дейсе, тюз  этесе, кёре-кёре турама жазгъанларынгы, мен а, бу арт  жыллада артыгъыракъда   газетибизни не ючюн бек сюйгеними юсюнден  айтайым санга»,- деп, кёп  затны юсюнден  сагъыш  эте, эсине тюшюре тынгылады  да, былай  айтып   башлады: «1970 жылда  Японияны  Осака  шахарында  битеудуния  
кёрмюч  ЭКСПО-70 ачылгъаны  себепли  республикадан Нальчик шахарны прокурору  Муаед Ашинов бла  мен, башха совет  туристле  бла  бирге алгъа  самолёт бла,  ызы  бла   кеме бла  да  барып,  ол жерге  тюшдюк.  Анда  77 къыралны  экспонатларыны хар   не  жаны  бла да   бири бирине  ушамагъан  энчиликлери  
кёрюнюп  тура  эди. СССР-ни   павильону  къайсы  болгъанын  тёппесинде  къызыл  байрагъыбыз, юсюнде  оракъ  бла   салта белгили   этип  тура  эди.  

Кёрмюч  бла  танышыуну  кесибизникинден  башлагъан эдик.  Совет союзну  космонавтикада,  илмуда,  промышленностьда, эл мюлкде жетишимлерибизни юсюнден  хапарлагъан  киноленталаны  да  кёргюзте  эдиле… Беш  бёлюмлю павильонубуздан  биринде  Ленинни сагъатын, къаламын, кийимлерин  да  кёрген  эдик.  Ючюнчю  кесек  совет  культурагъа  бла  литературагъа  аталып эди.  Мында  экспонатла асыры  кёпден, къайсысына   къараргъа  билмей,   ауара  бола, кенг   столну  юсюнде  газетлеге  кёзюм   илинди.  Алагъа  къарай  барып, къазах, къыргъыз, узбек, татар,  дюгер, гюржю, башкир, эстон, молдован  изданияланы  къатларында «Коммунизмге жолну» кёрдюм! 

Уллу ёхтемлик  сезим санларымы бийлеп, кёлюм  толду. Азап  кёчгюнчюлюкню  заманында  артыкълыкъ, тенгсизлик, учузлукъ  да сынагъан  миллетни басма  сёзю  башха халкъланы  газетлерине тенг болуп, узакъ Японияда, битеудуния кёрмючге тюшгенине  къалай  ёхтемленмей  къалыр  эдим?!   Кёз  жашларым  саркъа, газетими къол аязым бла  сылап турдум. Ала  мени  жюрек  къууанчымы  тамычылары  эдиле»,- дегенинде, мени  да  кёлюм  толгъан  эди.  

Кёп  ишни тындырыргъа, ачыкъларгъа   жетишеди   газетибиз. Аны   Орта  Азиядан  бла  Къазахстандан  ата  ташларына  келалмай къалгъанла журтубузгъа  тансыкълыкъларын  «Заманны»    бетлерине къарай   алгъанларына кесим  шагъатма. Къонакъгъа  келселе, аны эмда «Минги-Тау» журналны  не  кёп  жыйып  берсек  да,   неден  да  бек  алагъа  къууанадыла.

Забакъланы Гитчени туугъан-туудукълары, киеулери, келинлери  келген  эдиле да алгъаракълада  Къыргъызда  Бишкекден  Мисирланы  Солтан  бла  Ново-Покровкадан  Къайталаны  Люба, Къазахстанны Жамбул  шахарларындан  Мисирланы  Жамал, Туркестан  шахарда  эм  аны  тёгерегиндеги   Келтау, Бюргем, Кушата деген  элледе  жашагъан  таулулагъа  деп, битеу  орамыбыздан  жыйып, «Заман»  газетлерибизни  ол узакъ журтлада  жашагъан   жерлешлерибизге уллу саугъалача берип  жиберген эдик. Ала, сиз  къалай  насыплысыз, ана  тилибизде чыкъгъан  газетни  хар кюн  сайын  окъуйсуз деп сукъланадыла.

Кесими да жыл саным  уллая баргъаны сайын артыкъ багъалайма газетибизни. Ишлерине къайгъырыулу къарагъан  таматалары,  журналистлери жазгъан материалланы тематикасы  кенгди,  жашауну кёп  тюрлю  жанларын алады. Алай  бла  редакцияны  коллективини ёсгенин, аны корреспондентлерини  усталыкълары кётюрюлгенин биз, окъуучула, кёребиз, сезебиз. «Заман» Японияда угъай,  битеу дунияда  да   аты  айтылырча болсун, дейбиз.