Малланы багъыуда хайырланылгъан дарманланы чыгъарыу айныйды

Ветеринарияда хайырланылгъан препаратладан къытлыкъ болмазча эмда бизни къыралда чыгъарылгъан быллай продукциягъа сурамны жалчытырча РФ-ни Эл мюлк министерствосу тийишли фабрикалада эмда предприятиялада производствону кенгертирге кереклисин къолгъа алгъанды. Къыралны эл мюлк министрини орунбасары Максим Увайдов айтханнга кёре, Россейде быллай препаратланы эмда вакциналаны битеу тюрлюлери чыгъарыладыла. Диагностика ишледе хайырланылгъан затланы юсюнден айтханда да иш алайды. Ахыр жылны ичинде тийишли тизмеге 117 жангы препарат къошулгъанды. Барыны да ёлчеми уа 1,2 мингден озады. Жюзден артыкъ фабрика былтыр вакциналадан - 14 миллиард, фармацевтика продуктладан а 170 миллион доза жарашдыргъандыла.

Сёз ючюн, «Агроветзащита» ООО къуртланы къыргъан препаратланы къадар тюрлюлерин чыгъарады. «АлексАнн» эм башха компанияла уа багъыуда хайырланылгъан дарманланы 41 жангы тюрлюсюн жарашдыргъандыла. «Московский эндокринный завод», «Ветбиохим», «Ветзвероцентр», «Апиценна» предприятияла антибиотикле, анестетикле, вакцинала эм башха дарманла бла препаратла чыгъарадыла, бирлерин кёп болмай къурагъандыла неда энди хазыр эте турадыла. Аны айтханлары бла федерал министерствода Россейде ветеринария препаратладан къытлыкъ боллукъ тюйюлдю деп ышандырадыла, кесибизни компанияла бу рынокда тири ишлегенлерин белгилейдиле.

Быллай затланы жюзге жууукъ тюрлюсюн министерство кеси да сатып алып, регионлагъа жибереди. Рынокда болум тюрленирик болса, предприятияла бла оноулашып мадар излейди. Дарманла излеген хайырланыучулагъа таплыкъгъа деп «Ирена» деген информациялы системаны жарашдыргъанды.

 «Дарманланы жюрютюуню юсюнден» Федерал законнга кийирилирге боллукъ тюрлениулени тизмеси Къырал Думада сюзюуге жиберилгенди. Бу проект къабыл этилсе, маллагъа деп бизни къыралда чыгъарылгъан препаратланы регистрациясы бютюнда терк этилликди.