Миллет проектлени тамамлауда – алчыланы санында

Былтыр къырал власть органланы бла муниципал къуралыуланы араларында этилген келишимлени чеклеринде  жер-жерли бюджетлеге миллет эм муниципал проектледе белгиленнген жумушланы жашауда бардырыугъа 1,7 миллиард сом бёлюннгенди. Аны юсюнден «КъМР-де муниципал къуралыуланы совети» ассоциацияны жыйылыуунда аны правленини башчысы Максим Панагов белгили этгенди.

  Аны айтханына кёре, битеу да бирге республикагъа миллет проектлени чеклеринде жумушлагъа 8,4 миллиард сом бёлюннгенди. «Былтыр Къабарты-Малкъар миллет проектлени толтурууну эсеплерине кёре алчы регионлагъа киргенди. Бютюнда «Къоркъуусуз эм ахшы жолла» эмда «Ахшы шахар болумланы къурау» федерал проектлени кёрюмдюлери игидиле»,-дегенди докладчы. 

 Максим Панаговну айтханына кёре, былтыр муниципал жолланы 116 километри тап халгъа келтирилгендиле, ол санда Нальчикде 29 орам,  Вольный Аулну бла Хасанияны байлагъан жол жангыртылгъандыла. Дагъыда   «Прохладн-Эльхотово»,  «Дейское – Верхний Курп» эм башха трассала тап халгъа келтирилгендиле.

Элледе бла шахарлада жамауат бирге жыйылгъан, солугъан 34 жер бла кёп къатлы юйлени 89 арбазы игилендирилгендиле, Звездныйде сабий сад, Бахсанда физкультура-саулукъ сакълау комплекс ишлетилгендиле. Битеу да бирге былтыр элледе школлада 17 спорт зал бла  суу бла жалчытыу 11 объект жангыртылгъандыла.

- Адамланы осал, оюлургъа къоркъуулу юйледен кёчюрюу программаны республика болжалдан алгъа бошагъанын энчи айтыргъа керекди. Аны чеклеринде 291 юйюрню жашау болумлары игилендирилгендиле. Андан сора да «Жашау журт» федерал программаны чеклеринде 514 минг квадрат метр жашау журт ишлетилгенди,-деп билдиргенди докладчы.

Максим Паганов миллет эм муниципла программаланы чеклеринде хар районда къаллай жумушла толтурулгъанларын да санагъанды. Сёзге, Элбрус районда Огъары Бахсанда школгъа дери билим бериу бёлюмню мекямы, Тырныауузда 2 школну спорт заллары   битдирилгендиле.  Быллымда, Кёнделенде, Элбрусда эмда Тырныауузда кёп къатлы юйлени 5 арбазы жангыртылгъанды. Кёнделенде бла Лашкутада суу бла жалчытыу объектле, жолла тап халгъа келтириледиле.

 Лескен районну Ташлы-Тала элинде уа сабий садны мекямы андан ары ишлетиледи.

Черек районда тамамланнган жумушланы арасында доклачы Огъары Малкъарда Маданият юй тынгылы жангыртылгъанын, Бабугентде, Огъары Малкъарда, Огъары Жемталада жамауат бирге солугъан жерле тапландырылгъанларын белгилегенди. Вольный аул-Хасания-Герпегеж, Къашхатау трассада жангыртыу жумушла толтурулгъандыла,   Герпегежде суу ызла жангыртыладыла.

- Толусунлай айтханда, республикада социал магъаналы соруула бийик даражада тамамланадыла,-дегенди ол эмда власть органлагъа муниципал къуралыулагъа этилген болушлукъ ючюн ыразылыгъын билдиргенди.