Жашау журт къоллу болургъа ахшы онгла

Быйыл биринчи апрельден башлап  рынокдан гитче ставкала бла берилген льготалы   ипотекалагъа тюрлениуле кийирилгендиле. Анга кёре,  Москвада жашау журт алыргъа онеки, башха регионлада уа алты миллион сом ёнкюч берилликди.   Аны бла бирге жылгъа  алты, юч, эки  процент  тёлерча  юйюр, эл эм дальневосточный ипотекала да сакъланадыла.    

Былтыр Къабарты-Малкъарда организацияла бла энчи иелени 514,4 минг квадрат метрде жашау журт ишлегендиле. Ол буруннгу жыл бла тенглешдиргенде,  102,8 процентге кёпдю,-  деп билдириледи КъМР-ни Къурулуш  эмда жашау журт-коммунал мюлк  министерствосуну пресс-службасындан.

Кёп фатарлы жашау журтланы къурулушу бла кюрешген организацияла былтыр  39 юй салгъандыла. Анга кёре   120,4 минг квадрат метр чакълы бирде   2025 фатар ишленнгенди. Ол саулай республикада бардырылгъан къурулушдан 23,4 процентди. Былтыр бла тенглешдиргенде, ол 104,2 процентге кёпдю.

Энчи иелилени кючю бла 394 минг квадрат метрде  3386 юй  ишленнгенди. Ол да былтыр бла тенглешдиргенде,  102,4 процентге кёпдю. Саулай алып айтханда,  энчи иелилеге къурулуш бёлюмню 76,6 проценти жетеди.

- Льготалы ипотека,  кертиси бла да,  фатар къоллу болургъа излгенлеге ахшы себепликди. Регионда жашагъанла жылгъа алты процент тёлерча юйюр ипотеканы неда жангы  юйледе фатар алыр ючюн 12- процентлик ёнкючню хайырланыргъа боллукъдула. Бусагъатда болумгъа кёре ала эм гитче ставка бла берилгенлерин да белгилерчады,- дейди «Городское бюро недвижимости» биригиуню тамасы  Марина Сергеева.