Къурулуш жаны бла законла жангыртылгъандыла

Къыралда жашау журтланы къурулушларын бардырыу жаны бла законлагъа тюзетиуле кийирилгендиле. Аланы бизге КъМР-ни   прокуроруну тамата болушлукъчусу Сотталаны Жанна ангылатады.

  Быйылдан башлап жашау журтну болуму, ол санда  оюлургъа къоркъуулу мекямланы санына  кийирилгени,  жеринден тепдирилмеген ырысхыны бирикдирилген тизмесинде (ЕГРН) кёргюзтюлюрге керекди.

- Быйыл 1 февральдан башлап кёп къатлы жашау журтну тынгылы жангыртылыргъа кереклиси, неда ол оюлургъа къоркъуулу объектлени тизмесине кийирилгени ачыкъ этилирге тийишлиди. Алай бла бу шартла ЕГРН-ден берилген справкада кёргюзтюллюкдюле. Къырал эм жер-жерли власть органла бу жаны бла битеу шартланы Росреестрге 1 июлгъа дери берирге борчлудула,-дегенди Жанна Таукановна.

2021 жылда 25 майда къабыл кёрюлген 148-ФЗ закон  кючюне быйыл 1 февральда киргенди. Ол «Жеринден тепдирилмеген ырысхыны къырал эсепге салыуну юсюнден» законнга тюзетиуле кийиргенди, кёп къатлы жашау журтну болумун инсанлагъа ачыкъ этер мурат бла хазырланнганды.

Жангы жорукълагъа кёре кадастргъа кёп къатлы жашау журт оюла тургъаны, аны ояргъа неда тынгылы жангыртыргъа кереклиси, мекямны ичинде фатарда жашаргъа жарамагъаны белгили этилирге керекди.

- Башында айтханыбызча, бу жаны бла шартланы власть органла Росреестрге билдирирге борчлудула.   Фатар сатып алыргъа сюйгенле уа алай бла мекям не халда болгъанын  билликдиле. 1 мартда уа РФ-ни Къурулуш министерствосуну «Жашау      журтланы хайырланыуну жорукъларыны юсюнден» буйругъу кючюне киргенди. Анда муниципал фатарлада жашагъанланы, аланы арендагъа алгъанланы эмда иелерини эркинликлери бла борчлары тохташдырылгъандыла,-дегенди Жанна Таукановна.

 Документде къоншула бир бирлерини праволарына хурмет этерге, кеслерини фатарларын эмда юйде жашагъанла бирге хайырланнган мюлкню тазалыкъда тутаргъа, чыкъгъан кемчиликлени терк окъуна кетерирге керек болгъанлары тохташдырылгъанды. Бу жууаплылыкъ фатарны  социал амал бла арендагъа алгъанлагъа да   белгиленнгенди.

Жангы жорукълагъа тийишлиликде, жууаплы органла мекямланы болумларын контрольда тутаргъа керекдиле.  Инсанла фатарны терезелерин, балконда эшиклени алышыргъа, аланы орунларына жылыуну аягъанланы салыргъа, къабыргъаланы эркин этилген материалла бла жылытыргъа боллукъдула. Алай юйню тыш сыфатын бузаргъа жарамайды. 

- Балконну жабардан, терезеле орнатырдан алгъа, шахарны айбатландырыуну жорукълары бла шагъырей болургъа чакъырама.  Кёп къатлы юйню тыш сыфатыны болуму, ол санда аны мияла бла тышлау, муниципал праволу актла  неда субъектни законлары бла тохташдырылады,-деп чертгенди Сотталаны Жанна.

 Жангы низамда, алгъынча, балконда терезеле орнатыу, аны тышлау жаны бла эркинликни алыргъа кереклиси белгиленипди.  Ансыз жангыртыу жумушланы бардыргъанлагъа тазир салынады. Ол санда инсанлагъа 5 минг сом, жууаплы къуллукъчулагъа 4-5 минг сом, организациялагъа уа 40-50 минг сом тёлерге тюшерикди. Аны бла бирге  законсуз къурулушну кетерирге оноу да чыгъарыллыкъды. «Дагъыда сайдинг от тюшюуге къажау жорукълагъа келишмегенин айтырчады, аллайны орнатханнга да 4 минг сом тазир салыныргъа боллукъду»,-дегенди бизни ушакъ нёгерибиз.