Жерни законлу халгъа кёчюрюрге ашыгъыгъыз

 Росреестрни Къабарты-Малкъарда управлениясындан билдиргенлерине кёре, терек бахчачылыкъ биригиулени келечилерине жер юлюшлени хакъсыз бериу заман келир айны биринчисинде чыгъады. Ведомствода айтханларыча, аллай эркинлик, башхача айтханда,  участканы муниципалитетден торгла бардырмай неда ахча тёлемей алыр амал коммерциялы болмагъан (2019 жылда 1 январьгъа дери къуралгъан) аллай биригиулени келечилерине бериледи.

Жерни приватизация этерча заявленияны эмда битеу тийишли къагъытланы муниципалитетни администрациясына элтип берирге керекди. Анда аны дурус кёрселе, муниципалитет документлени Росреестрге жиберип, иеликге эркинликни къырал регистрациясын этдирликди. Заявление берген адам аны ючюн пошлина тёлемейди.