Асфальт чыгъарыучу заводла ишге хазырлана турадыла

Былтыр Къабарты-Малкъарны жол транспорт инфраструктура сферасында этилген ишлени хайырындан «Къоркъуусузлу качестволу жолла» деген миллет проектни баш кёрюмдюлери толтурулгъандыла. Аны бла норматив излемлеге келишген регион жолланы узунлугъу план бла салыннган кёрюмдюню озуп, 57,9 процентге жетгенди. Нальчикде жолланы юсюнден айтханда уа бу кёрюмдю 80 процентден окъуна атлагъанды. Ол алай болуруна быллай къурулушда хайырланылгъан мюлк-техника онгла иги болгъанлары себеплик этгенди дерчады.

Быйыл да бу проектни чеклеринде онсегиз объектни эмда беш кёпюрню жангыртыргъа умут этиледи. Аланы барыны да узунлугъу жюз километр чакълы болады. Бу ишде жаланда асфальтдан 150 минг тонна изленирикди. Аны себепли регионну Транспорт эмда жол мюлк министерствосу асфальт чыгъарыучу заводла анга къалай хазыр болгъанларын тинтеди.

Подряд организацияла эм азындан быллай сегиз заводну хайырланыргъа умутлудула. Ала бир сагъатха 60-130 тонна продукция берирге боллукъдула. Иш башланырны аллында ол объектледе оборудованиягъа къарайдыла, техника жумушланы тындырадыла, лабораторияларын да хазырлайдыла. Андан сора да заводланы тийрелерине зыгъыр бла юзмез, чайыр, минерал эмда башха къошакъла ташыйдыла.

Арт жыллада бизни республикада ЩМА асфальт кенг хайырланылып башланнганды. Заводла аны асламыракъ чыгъарып тебирерге умутлудула. Подряд организацияла да ишге хазырланып башлагъандыла. Бирлери жангы техника сатып аладыла, кеслеринде болгъан машиналагъа да ремонт этедиле.