Кёплени сейирсиндирген жорукъла бла оноула

Къытайда бардырылгъан XXIV  къыш Олимпиада оюнланы не жаны бла да башхалагъа ушамагъанларын кёпле белгилейдиле. Коммунизм ыз бла жашагъан къыралны кесини сейир жорукълары бардыла. Аланы бир бирлерин властьла Оюнла бардырылгъан къысха кезиуге  къабыл этгендиле. Сёз ючюн озгъан ыйыкъда тюкеннге келген алыучуланы биринде ковид вирусха тести аны ауругъанын кёргюзтгенди. Бу болум бла байламлы, ол кезиуде анда болгъан битеу халкъны аллындан жабып къойгъандыла. Сау кечени эм экинчи кюнню адамлагъа жерде жатаргъа эм болгъан ашладан ашаргъа тюшгенди. Андан алгъаракъда офислени биринде да халкъны аллындан кирит салып, тышына жибермей тутхандыла. Битеу бу хал вирус келгенлеге жукъмасын деген мадар бла этиледи, деп ангылатадыла къонакъбайла.

 Бу кюнледе уа Оюнланы белгиси Бин Дуньдунь панданы гинжилерин этип сатаргъа эркинлиги болмагъан предпринимательни тутхандыла. Анга 470 минг сом ахча багъасы тазир тёлерге керек боллугъу бла да чекленмей, тюрмеде да бир жыл ётдюрюрге тюшерикди. Анга дери дагъыда ол илляуланы сатып алгъан ючеулен тутулгъандыла. Ала да административ жууаплыкъгъа тартылгъандыла.

 Эришиулени юслеринден айтханда уа, аланы сюзюуде россейли спортчулагъа, нек эсе да, энчи эс бёлюнеди. Бизни атлетле бла жарсыулу кезиуледен бири, фигуристлерибиз бла байламлыды. Алагъа болмачы сылтаула бла, къытхан «алтынларын» бермей турадыла…  Халкъла аралы олимпиада комитетини (МОК) келечилери бу болумну Камила Валиеваны 25 декабрьде берген анализинде допинг табылгъаны бла байлайдыла. Алай эришиулени аллында эм андан сора кёрюмдюлери уа спортчуну тазадыла. Дагъыда МОК билдиргеннге кёре, ол энчи эришиулеге къатышып, анда майдал къоллу болса, ала хорлагъанланы саугъалауну бардырлыкъ тюйюлдюле.

Россейни Спорт министри Олег Матыцин Валиевагъа Спорт арбитраж сюд эришиулеге къатышыргъа эркинлик бергенин тюз оноугъа санагъанын чертгенди.

 Болумну юсюнден кеслерини оюмларын белгили спортчула да билдиргендиле. Татьяна Навка, Илья Авербух эм башхала Камила бу сынамдан ёхтем ётерине ийнаннганларын билдиргендиле. Дагъыда ала энчилик эришиуледе башха фигуристкаларыбызны Александра Трусованы бла Анна Щербакованы да унутур кереклиси болмагъанын белгилегендиле.