Эсепле чыгъарылгъандыла, планла туура этилгендиле

Нальчикде  КъМР-ни Башчысы Казбек Коковну  «Кавказ» жол управленияны таматасы  Александр Лукашук бла ишчи тюбешиую болгъанды. Аны кезиуюнде Къабарты-Малкъарда федерал автомобиль жолланы  айнытыуну планлары сюзюлгендиле. Ушакъгъа  КъМР-ни Правительствосуну  Председатели Мусукланы Алий, КъМР-ни транспорт эмда жол мюлк министри Аслан Дышеков,  «Кавказ» жол управленияны таматасыны орунбасары Анзор Зубкаев бла управленияны баш инженери Виталий Гулаков къатышхандыла.

Тюбешиуню башлай. Казбек Коков «Къоркъуусуз эмда тынгылы жолла» миллет проектни жашауда бардырыу регионну айнытыугъа уллу себеплик этгенин чертгенди. Арт юч жылны ичинде республикада  регион магъаналы жолланы 500 километри чакълы бири жангыртылгъанды, 135 километринде уа чыракъла салыннгандыла. «Россейни Президенти, инсанланы ырахатлыкъларын эмда къоркъуусузлукъларын жалчытыргъа кереклисини юсюнден айта, жолланы айнытыргъа деп аллай борч салгъанды.  «Кавказ» федерал жол кенгертилгенини хайырындан 2021 жылда бек жарсыулу аварияла азайгъандыла», - деп къошханды ол.

 Казбек Коков рекреация тийреледе федерал жолланы игилендириу артыкъда магъаналы болгъанын чертгенди. Ол экономиканы туризм бёлюмюн айнытыугъа себеплик этген амалладан бириди, дегенди. Мында бек уллу проектледен бири -  Прохладный-Баксан-Элбрус А-158  жолну суу ашамазча этиудю.

 Тюбешиуде дагъыда  барысы да хайырланнган бир ненча жолну юсюнден сёлешиннгенди, аланы федерал иеликге кёчюрюрге келишим этилгенди.

  Александр Лукашук билдиргеннге кёре,  «Кавказ» Упрдор  2019-2021 жыллада федерал жолланы 35,4 километрине тынгылы, 57, 2 километринде уа ууакъ ремонт этгенди. 95 километрде къоруулау затла салыннгандыла. Дагъыда иги кесек кёпюр ишленнгенди, адамла ётерча жерле къуралгъандыла, илипинле тартылгъандыла, чыракълы чыпынла орнатылгъандыла.

Управленияны таматасы 2022-2024 жыллада тамамланыллыкъ ишлени юслеринден да билдиргенди. Программагъа Малка элден Куба-Табагъа дери,  Аргудандан РСО-Алания чекге дери, Залукокоажени бла Прогрессни арасында, Урван – Огъары Малкъар – Уштулу жолланы тапландырыу киреди. Дагъыда  Урван – Огъары Малкъар – Уштулу автомобиль жолда тоннельледен бирини жангыртыуну проекти жарашдырыла турады, экинчисини проекти уа хазырды. 2024 жылгъа дери  13 кёпюрню хайырланыргъа берирге белгиленеди. Жылны ахырына дери уа 5 кёпюрге ремонт этилликди.

Тюбешиуню ахырында Казбек Коков республиканы «Кавказ» жол управление бла бирге ишлеую ахшы юлгю болгъанын, ол федерал эмда регион толтуруучу власть органланы араларында байламлыкъла къыйматлы къуралгъанларына шагъатлыкъ этгенин айтханды эмда къонакъгъа регионда бардыргъан иши ючюн жюрек ыразылыгъын билдиргенди.