«Омикрон» башха штаммланы оза башлагъанды, алай «дельта» жукъгъанла да кёплей къаладыла .

  КъМР-ни Башчысы Казбек Коков Коронавирус инфекциягъа къажау оператив штабны жыйылыуун бардыргъанды. Анга КъМР-ни Парламентини Председатели Татьяна Егорова, КъМР-ни Правительствосуну Председатели Мусукланы Алий,  министерстволаны бла ведомстволаны, муниципал къуралыуланы, право низамны сакълаучу органланы, жамауат биригиулени келечилери да къатышхандыла.

Бусагъатдагъы болумну юсюнден билдириуле бла Роспотребнадзорну КъМР-де Управлениясыны башчысы Жирослан Пагов  бла КъМР-ни саулукъ сакълау министри Рустам Калибатов сёлешгендиле. Ала кёргюзтген шартлагъа кёре, жангы коронавирус инфекциядан ауругъанланы санына терк къошулгъанлай барады. Арт сутканы ичинде  ауруу 300 чакълы бир адамгъа жукъгъанды.

 Кёрюмдюлени терк ёсгени тестледен ётгенле бютюн кёп болгъанлары бла да байламлыды. Жирослан Пагов айтханнга кёре, тохташдырылгъан марда  бир суткагъа 100 минг адамдан 300 мингин тестледен ётдюрюрге керек эсе, Къабарты-Малкъарда  100 минг адамдан 600-сю тинтиледи. Алгъаракълада республиканы Башчысыны буйругъу бла регион бюджетге 100 минг тест алыннганды. ОРВИ эмда коронавирус инфекция бирча терк жайылгъан кезиуде экспресс-тестле  коронавирусну терк ачыкъларгъа эмда созмай багъып башларгъа онг берликдиле.

 КъМР-ни баш къырал санитар врачы  «омикрон» оза башлагъанын, «дельта» жукъгъанла да алгъынча кёп болгъанларын билдиргенди.  Рустама Калибатов билдиргеннге кёре, амбулаториялада кеслерине бакъдыргъанланы саны 14 мингнге жетгендиле. Госпитальлагъа тюшгенлени саны да ёсе барады, бюгюнлюкде стационар болушлукъну 726 адам алады. Аладан 150-си – сабийледиле, реанимацияда да 61 саусуз барды.

Мусукланы Алий  республиканы Башчысыны оноуу бла алгъын бёлюннген ахчагъа амбулаториялада багъылгъанлагъа дарманла алыннганларыны юсюнден билдиргенди. Республиканы бюджетинден  32 миллион сом, федерал  бюджетден 26 миллион сом бёлюннгенди.  Алыннган дарманла республикагъа жиберилип бошай турадыла. Бу жумушха,Къабарты-Малкъарны оноучусуну буйругъу бла регион бюджетден озгъан баш кюн коронавирусдан ауругъанлагъа амбулаторитялада багъарча дарманла сатып алыргъа  дагъыда 50 миллион сом бёлюннгенди.

  Жыйылыуну ахырында Казбек Коков коронавирус кенг жайылгъан болумлагъа республиканы саулукъ сакълау системасы хазыр болгъанын, ишин тап къурагъанын, кёп затдан къыстырыкъ этилгенин да чертгенди Аны бла бирге медицина болушлукъ  къалай берилгенине контрольну къатыландырыргъа буюрпгъанды, хар тарыгъыугъа энчи эс бурургъа, жамауат бла байламлыкъны жалчытыргъа кереклисин эсгертгенди