Бек башы саусузланы ышаныуларыды

Бызынгыда  фельдшер болуп  ишлеген Аналаны Тасимни жашы Асланнга медицина жашаууну ёзеги болгъанды.   Туугъан элине ол 1992 жылда терк болушлукъ берген службада онеки жылны ишлегенден сора келгенди.  

Элде медиклеге иш бек кёпдю: профилактика, планнга кёре дарман салыу, санитар болумну тинтиу, керек болса, биринчи болушлукъ этиу, саусуз  дарманларын ичгенине бла къалгъанына, аны халына къарау, дагъыда алагъа ушаш кёп  жумушланы тамамларгъа тюшеди.
Фельдшер айтханнга кёре, арт жыллада элде медицина болушлукъ бериу игиленнгенди. Энди саусузланы жартысындан асламы  кеслерине  тышына кетмей бакъдырадыла.

-Врачны иши бир заманда да тынч болмайды,-дейди Аслан Тасимович. – Саусузну къыйналгъанына уллу кёллю болалмайса, ол  акъылынгы, къарыуунгу да алып къояды. 

Элде кеслерин ачытханла кёп болуучудула, нек дегенде эллилени кёбюсю техника бла ишлеуде  къоркъуусузлукъну жорукъларын сансыз этедиле неда билмейдиле. Ма быйыл да жаз башында тюз аллай иш болгъанды. Акъылбалыкъ болмагъан жашчыкъ бахчасында  мотоблок бла ишлей тургъанлай,  аягъы агрегатха тюшюп къалады. Анга фельдшерни  къысха заманны ичинде жетгени, дагъыда  терк болушлукъ берген кереклери да болгъанлары уллу палахдан къутхарыргъа себеплик этген эдиле. Алайда, Аслан кеси айтыучулай,  битеу кючюн, къарыуун, эсин да жыйып, биринчи болушлукъну береди: жаш бек къыйналмазча этеди, терк окъуна агрегатны  чачады, аягъыны сыннган кесеклерин  жыйышдырып къысдырады, къаны ууланмазча этеди.

-Аны, мени да насыбыбыз бар эди къан тамырлары юзюлмегенлерине, къанны  терк окъуна тохтаталгъанбыз. Андан сора кёп мычымай Бабугентге дери жетдиргенбиз, алайда уа терк болушлукъ берген машина да жетгенди,-деп  эсгереди Аслан Тасимович.

–Бюгюнлюкде бызынгылы  жашны аягъы Иллазаровну  аппаратындады, алай эсе уа, кёп бармай жашчыкъ кеси аякъларына сюелир, Аллах айтса, тау жоллада  чабып да айланыр.

Ма аллай кезиуле, Ана улу айтханнга кёре, медиклени  къыйын эмда  керекли ишлерине берилген уллу багъады.