Жолда жорукълагъа уллу къайгъырмагъанды

Кёп болмай Элбрус районну автоинспекторлары видеорегистраторгъа тюшюрюлген материаллагъа кёре, «Ford Transit» пассажир транспортну жюрютген жаш адамны жууапха тартхандыла. Ол жолну терс жанына чыгъып, кесине эм башхалагъа да къоркъуу салгъанды.    

Артда билиннгенча, 23-жыллыкъ жаш быллай категориялы улоуну жюрютюрге эркинлиги болмай тургъанлай нёгерин жетдирир ючюн сормай машинаны юйюнден алгъанды. Аны атасын да чакъырып Элбрус районну ОГИБДД-ны бёлюмюнде ангылатыу ушакъ бардыргъандыла. Ол мындан арысында бузукълукъ иш этмезге сёз бергенди.

Болсада жаш водитель бу жолгъа дери да жолда жорукълагъа уллу кёллю бола тургъаны тинтилгенди. Аны ючюн ол РФ-ни Административ бузукълукъланы кодексини 12.15-чи статьясыны 5-чи кесегине (терс обгон этгенине) эм 12.7-чи статьясыны 1-чи кесегине (тийишли категориясы болмагъанына) административ жууапха тартылгъанды.

Биринчи шарт бла байламлы бузукъчу бир жылгъа правасыз къалыргъа боллукъду, экинчи шарт ючюн а 5-15 минг сом тазир тёлерге тюшерикди.