Ветеран биригиуню ишин сюзгендиле эм тирилени саугъалагъандыла

КъМР-ни  Граждан обществону институтлары бла байламлыкъла жюрютюу эмда миллетлени ишлери жаны бла министерствосунда Урушну, урунууну, Сауутланнган кючлени  эмда право низамны сакълаучу  органланы республикалы  жамауат организациясыны кезиулю пленуму болгъанды. Анда 2018 жылда  ишни эсеплери чыгъарылгъандыла эмда  быйылгъа   борчла салыннгандыла.

Жыйылыугъа  КъМР-ни  Парламентини Председателини орунбасары Жанатайланы Салим, КъМР-ни  Башчысыны Администрациясыны  ич политика жаны бла управлениясыны  таматасы  Артём Кажаев,  «КъМР-ни профсоюз организацияларыны биригиую»  Союзну таматасы Фатимат Амшокова,  Граждан обществону институтлары бла байламлыкъла жюрютюу эмда миллетлени ишлери жаны бла министр Анзор  Курашинов,   ветеранланы шахар биригиуюню таматасы Абдуллаланы Мустафа, КъМР-де   ич ишлени ветеранларыны жамауат организациясыны председатели  Борис Думанов да   къатышхандыла.

Ветеранланы советини  таматасы Мухамед Шихабахов, былтыр тамамланнган ишлени юслеринден билдире, республикада ай сайын компенсация алыргъа эркинлик урунууну  24533  ветеранына,  репрессиялагъа тюшгенледен да 11586 адамгъа берилгенин айтханды.

Дагъыда   абадан тёлюге болушлукъгъа деп тюрлю-тюрлю  культура, жандауурлукъ  акцияла  бардырылгъандыла,  жангыз къалгъан къартлагъа, инвалидлеге   дайым да   социал болушлукъ этиледи. Ветеранланы, инвалидлени эмда жашаулары келгенлени  болумларын  бир кесек окъуна да игилендирир ючюн дагъыда кёп башха жумушла тамамланнганларын   да  белгилегенди тамата.

Андан сора сёлешгенлени   асламысы  биригиуню ишине бийик багъа бергендиле, мындан ары  эс бурургъа керекли жумушланы да туура этгендиле.

Тюбешиуню ахырында хычыуун жумуш да тамамланылгъанды.Бир къауум адамгъа  РФ-ни эмда КъМР-ни  ветеран организацияларыны  сыйлы грамоталары, юбилей майдаллары да берилгендиле. Алагъа тийишли болгъанланы араларында  Къашхатаудан Чеченланы Георгий,  Къудайланы Мажит, Огъары Малкъардан Къазакъланы Борис, Абдуллаланы Мустафа, Уяналаны Владимир да бардыла.