Сёз курортланы онгларыны, транспорт инфраструктураны эм туризмни айнытыуну юсюнден баргъанды

Июль айда Россейни транспортчуларыны союзуну эм Сатыу-алыу эмда промышленность палатасыны  официальный изданияларыны «Жолла эм транспорт» деген журналында Къабарты-Малкъар Республиканы Башчысы Казбек Коков бла ушакъ басмаланнганды.

Ушакъны кезиуюнде Казбек Валерьевич курортланы онгларыны, транспорт инфраструктураны эм туризмни айнытыуну юсюнден айтханды. Бек алгъа сёз Эльбрус районну юсюнден баргъанды, таулада лыжала бла учарча курортланы айнытыу къырал магъаналы ишди. Минги тауну  этеклеринде Россейде эм бийик канатка жол барды, андан сора да жангы лыжала бла учарча трассала ишлене турадыла, арт алты жылны ичинде ол тийрелеге келген туристлени саны эки кереден  кёпге ёсгенди.

Бюгюнлюкде энтда да эки канатка жолну къурулушу башланнганды, аны бла лыжачыла эм сноубордистле 3515 километр бийикликге чыгъарыллыкъдыла. Биз Минги тауну тийреси бла чекленип къалмайбыз, туризмни айнытыугъа Черек, Эльбрус эм Зольск районла да киредиле, деп чертгенди Казбек Коков.

 Андан сора, ушакъда КъМР-ни Башчысы Нальчикни аэропортун жангыртыу бла байламлы проект болгъанын эм «Новопорт» холдинг бла келишим этилгенин, «Къоркъуусузлу  эм качестволу жолла»  деген миллет проектге кёре, автомобиль жолланы къурулушу эм тынгылы ромонту андан ары бардырыллыгъын чертгенди. К. Коковну айтханына кёре, шёндю республикада 230 километр жол тап халгъа келтирилгенди, ол санда уллу магъана къуркъуусузлукъну жалчытыугъа бериледи. Автомобиль жолланы жанларын чыракъла бла жалчытыугъа, адамала ётерча эм видеофиксация системаланы орнатыугъа да уллу магъана бериледи.

Бардырылгъан мониторингге кёре, Къабарты-Малкъар Республика жол къурулуш жаны бла регион проектлени толтуруу бла къыралда беш иги ишлеген регионну санына киргенди, - деп белгилейди журнал.