Кёп фатарлы юйде битеулю жумушла деген неди

Кёп фатарлы юйде жашагъанла кеслери хайырланнган коммунальный жумушладан сора юйню кереклисине къоратылгъан ресурсла ючюн хакъны къалай тёлерге керекдиле деп кёпле сорадыла. Бу материалда КъМР-ни Энергетика, тарифле эмда жашау журтлагъа надзор этиу жаны бла къырал комитетинде аны бла байламлы ангылатханларыны юсюнден айтылады.

Кёп фатарлы юйде битеулю жумушла (ОДН) деген ол неди?

Быллай юйлеге коммунальный ресурсла адамла хайырланнгандан эсе асламыракъ келедиле. Аны ёлчеми юйню кесини эсеплеучю прибору бла фатарлада быллай приборла кёргюзтгенлени башхалыгъына кёре тергеледи. Ол а адамланы жашагъан жерлерини ёлчемине кёре аланы арасында тенг юлешинеди.

Бу тёлеулеге не киреди?

Электрокючню юсюнден айтханда, мында къоранчла бу кесекледен къураладыла:

- подъездлени, тапкаланы жарытыу;

- домофонну ишлетиу;

- лифтлени ток бла жалчытыу;

- тёгерекге-башха къараучу видеокамераланы, огъары этажлагъа сууну кётюрюу насосланы (ала бар эселе), жылытыу оборудованияны автоматика халда ишлетиу системаланы жалчытыу.

Таза суу бла байламлы къоранчла:

- тапкаланы, кир-кипчикни энишге тюшюрген быргъыланы тазалау;

- къыртышлагъа, гюлле ёсген жерлеге суу сугъарыу;

- коммуникация сетьлени тазалау;

- юйню ичинде суу быргъылада башха къоранчла.

Исси суу бла:

- юйде батареялагъа ремонт этиу бла байламлы жумушла;

- жылыу бла жалчытыу кезиуге хазырланнганда тийишли сетьлени тап халгъа келтириу;

- юйню ичинде суу быргъылада башха къоранчла.

Тёлеулени азайтыргъа амал бармыды?

Бек игиси - хар фатарда да битеу коммунальный жумушланы тергеген приборлары болуп, ала кёргюзтгенни ресурсланы жиберген организациялагъа хар ай сайын заманында билдирип турургъа. Быллай приборланы орнатханлай, ол шарт тергеу системагъа тюшер ючюн, аны юсюнден мычымай ЖЭУ-ге билдирирге керекди.

Электрокючню юсюнден айтханда да амал алайды: прибор кёргюзтгенни сагъынылгъан организациягъа заманында билдирирге. Дагъыда къоншула неда башхала ток сетьге эркинликсиз къошулмазча кёз-къулакъ болуп жокъду. Эски ток ызланы жангысына алышындырса да хатасы боллукъ тюйюлдю. Нек дегенде алада къоранчла аслам болургъа боллукъдула. Подъездледе тёрели чыракъланы орунуна светодиод тюрлюлерин салса, ол да къоранчланы азайтыргъа себеплик этерикди.

Таза суу ючюн норматив бла тёлемезча хар фатарда да эсеплеучю приборла орнатыргъа тийишлиди. Алары болмагъанла, жарсыугъа, сууну аяргъа кюрешмейдиле, аны белгиленнген мардасындан артыкъ хайырланадыла. Быллай къоранчлагъа дагъыда тийишлисича ишлемеген сантехника да къошулса уа, бютюнда.

Кёп фатарлы юйде битеулю жумушла ючюн къоранчланы азайтыу борч юйню жумушларына къарагъан компанияны боюнундады. Ол себепден адамла аны ишине кёз-къулакъ болургъа, коммунальный ресурсла азыракъ хайырланырча мадар этерге чакъырыргъа да эркиндиле.

Фатарда бир адам да жашамай эсе уа...

Юйню битеулю жумушлары ючюн къоранчла фатарда адамны тургъаны неда къалгъаны бла байламлы тюйюлдюле. Ол себепден аны иеси быллай тёлеуден эркин этилмейди. Аны къой, анда бир кезиу жашамай тургъанлыкъгъа да башхасы жокъду.

Келген ресурсланы эсеплеген прибору болгъан юйде жашагъан биреулен коммунальный жумушла ючюн хакъ тёлемей турса, аны ючюн ахчаны башхаламы берликдиле?

Ол тюз хапар тюйюлдю. Фатарда быллай прибор болмаса, хайырланнган ресурсну багъасы норматив бла тергеледи. Ол а юйню кесини прибору кёргюзтгенден кетериледи. Фатарда прибор бар эсе уа, башында айтылгъаныча, ол кёргюзтгенни заманында билдирип турургъа тийишлиди.

Юйню битеулю жумушлары жашау журт жумушлагъа киремидиле?

Быйыл 30 мартда къабыл кёрюлген 73 номерли Федеральный закон бла "О внесении изменений в Жилищный Кодекс Российской Федерации и отдельные законодательные акты Российской Федерации" деген законну онекинчи статьясына тюрлениуле кийирилгендиле. Алай бла келир жыл биринчи январьдан башлап, юйню битеулю жумушлары ючюн тёлеуле «коммунальный» дегенден «жашау журтла жумушла» дегеннге кёчюрюледиле. Аны хайырындан битеу юйде этилген къоранчланы адамланы боюнларына кёчюрюуден къутулургъа боллукъду. Управляющий компанияла да энди ресурсланы аяргъа, аланы урлаугъа къажау турургъа кюреширикдиле. Нек дегенде сагъынылгъан къоранчла белгиленнген мардасындан артыкъ болсала, аны ала кеслери тёлерикдиле.