Тайланддан – кюмюш майдал бла

Кёп болмай Къабарты-Малкъар къырал университетни прогрессив эм аддитив технологияла арасыны  алимлери   Бангкок шахарда  халкъла аралы IPITEX кёрмючде «Бийик технологиялы полимерле эм композитле» деген ишлери ючюн  кюмюш майдал бла саугъаланнгандыла. 
Кёрмючде жыйырма беш къыралдан илму эм техника жаны бла мингнге жууукъ жангычылыкъ бла проект  кёргюзтюлгенди, ол санда онусу - Россейден. Аланы  арасында  КъМКъУ-ну прогрессив  полимерле лабораториясыны ишлери да бар эдиле. Специалистле эмда  жюри алагъа бийик багъа бергендиле. 

- Бизни   полимерлерибизча  Россейде  жокъду. Дунияда да ала эм игиледен бирлерине саналадыла.  Аланы къураугъа эм промышленностьну стратегиялы магъанасы болгъан  бёлюмледе хайырланыргъа жарагъанына энчи эс бёлюннгенди.   Ишлерибизге эс бургъанланы  мингле бла санаргъа боллукъду, ол шарт бизни  бек къууандыргъанды, дейди   араны таматасы, профессор Светлана  Хаширова. 

IPITEX деген кёрмючню магъанасы - жангы технологияла бла шагъырейлендирирге, алимле бла  инвесторла бирге ишлерча  онг  бериргеди, илму-технология эм экономика байламлыкъланы айнытыргъады. Анда болгъан къонакъланы арасында Тайландны вице-премьери Праджин Джунтонг кёрмюч,   илмуну айнытыугъа бек уллу себеплик этгенин, коммерция жаны бла  да къыйматлы болгъанын  белгилегенди.