Республикалы сабий больницаны жангыртыргъа РФ-ни Правительствосу ахча бергенди

РФ-ни Правительствосуну таматасы Михаил Мишустин къол салгъан буйрукъгъа кёре, Республикалы сабий больницаны тынгылы жангыртыргъа къыстытыкъ фонддан 125 миллион сом бёлюнюрюкдю. Быллай билдириу Россейни Правительствосуну официальный сайтында орнатылып турады.

 15 июнда Пятигорск шахарда Михаил Мишустинни бла Казбек Коковну тюбешиую болгъан эди, ол кезиуде Россейни премьер- министри Къабарты-Малкъарны Башчысына  республикалы халда регионда жангыз болгъан сабий стационарны ремонтуна болушургъа айтхан эди.

«Бек башы - сабийледиле. Артыкъ да Кьабарты-Малкъарда, мында ала кёп тууадыла. Мен акъыл этгенден, айтылгъан жумушну тамамларгъа керекли ырысхыны табарбыз, битеу гитчелеге деп аламат сабий клиникалы больница болурча»,- деген эди ол заманда Михаил Мишустин. Кесини жанындан, Казбек Коков Россейни Правительствосуну Председателине Къабарты-Малкъаргъа бек керекли магъаналы сорууланы тамамларгъа къайгъыргъаны ючюн ыспас этген эди.

Сабийлени бакъгъан учрежденияны жангыртыу алагъа медицина болушлукъну игилендириуге, ол санда тюрлю-тюрлю амалланы сингдирирге эм бийик технология медицина болушлукъну  берирге, больницада ишлегенлени эм анда ауруп жатханлагъа тап онгла къураргъа себеплик этерикди.

 Сабий больница 1987 жылда ишленнгенди, анга тынгылы ремонт эм модернизация этерге керек болуп турады. Жыл сайын мында республиканы районларындан бла шахарларындан 15 минге жууукъ сабий медицина болушлукъ алады.