Автобусла тохтаучу жерле къаллай болурларын шахарчыла сайлайдыла

Нальчикни «Тири гражданин» деген интернет-порталында шахарда остановка комплексле къаллай болургъа кереклисини юсюнден къол кётюрюу башланнганды, деп айтылады мэрияны билдириуюнде.

Къол кётюрюуге къатышхан гражданла, ала оюм этгенден, шахарны архитектурасына бегирек да къаллай (автобусла тохтаучу) комплекс келишгенин билдирирге боллукъдула.

Сюзюуге саулай юч проект чыгъарылгъанды. Биринчиси - «Классика» деген павильонду. Анда чыракъла бла жарытылгъан реклама конструкция, видеокамерала эмда Wi-Fi боллукъду. «Next» комплекс да аллай затла бла жалчытылынырыкъды. «Мега» деген павильонда уа къошакъ затладан жаланда реклама кёргюзтген конструкциясы боллукъду.

Эсге сала айтсакъ, «Тири гражданин» портал республиканы ара шахарында жашагъанла аны айнытыу жаны бла ишлени юсю бла оюмларын билдирирча къуралгъанды. Анда сюзюуге мэрияны жууаплылыгъында болгъан жумушла чыгъарыладыла. Ала бла байламлы оноу этиуде къол кётюрюуню эсеплерине да къаралады. Электрон соруула дагъыда golosnalchik.ru интернет-сайтда эмда смартфонла бла (iOS неда Android приложенияла бла) бардырыладыла. Алагъа шахарда жашагъан, кесини да къырал жумушланы жалчытыу порталда регистрациясы болгъан ким да къатышыргъа эркинди.