Айырыула ачыкъ ётерча битеу мадарла этиледиле

Республиканы Жамауат палатасында Россейни Президентинде Граждан обществону айнытыу эм адамны эркинликлери жаны бла советни келечиси «Жалынчакъсыз жамауат мониторинг» ассоциацияны башчысы Александр Брод бла тюбешиу болгъанды. Анга айырыулагъа къарарыкъ штабны, регион айырыу комиссиясыны, политика партияланы бёлюмлерини келечилери, жамауат иш бла тири кюрешгенле да къатышхандыла.

Александр Брод жыйылгъанланы айырыулагъа жалынчакъсыз къарауда сынам бла шагъырейлендиргенди, чыгъаргъа боллукъ тюрлю-тюрлю бузукълукъланы юслеринден айтханды.

- Оператив штабны борчу айырыу ишни битеу кесеклерин – кандидатла бла танышдырыу, аланы эсеплеу, агитацияны бардырыу, айырыуланы ётдюрюу, эсеплени чыгъарыу – тинтирча майдан къураргъа тийишлиди. Айырыу комиссия бла байламлыкъла тохташдырыргъа, адамлагъа билдириулени ачыкъ айтыргъа, ётюрюк информациягъа къажау ишни тамамларгъа керекди, - дегенди ол.

Право сакълаучу чертгенича, арт жыллада Центризбирком бузукълукълагъа терк эс бурады, айырыу законодательствону жамауатны излемлерине кёре жангыртады, жангы ахшы сынамны кийиреди. Айырыуланы талай кюнню ичинде бардырыу, участкалада видеокамераланы орнатыу, «Мобильный избиратель» деген сервисни жарашдырыу, къол кётюрюрге дистанцион халда боллугъу – ала барысы да айырыулагъа къатышыуну женгиллендиредиле эм аланы эсеплери халатсыз чыгъарырларына себеплик этедиле.

Александр Брод айтханыча, участкалада чыкъгъан проблемаланы юслеринден заманында билдирирге керекди, аны ючюн ассоциация айырыуланы кюнлеринде жамауат штаб бла къысха байламлыкъда турлукъду, жалынчакъсыз жамауат къараучуланы къатышыулары бла келген билдириуню  сюзерикди. Регион къараучуланы юйретиу программагъа къошулгъанды, 2018 жылдан бери бу жаны бла иги жанына тюрлениуле бардыла, дегенди ол.

Къабарты-Малкъарда айырыулагъа контроль этген эм жамауат къарауну къурагъан штабны башчысы Николай Маслов республикада бу жаны бла къаллай иш толтурулгъанын билдиргенди. Алай бла бизде 355 айырыу участка ачыллыкъды, алада 710 къараучу турлукъдула. Бюгюнлюкде аланы къаууму жыйылгъанды, ала барысы да юйрениулени ётгендиле. Политика партияланы 5 регион бёлюмлери, 4 коммерциялы болмагъан организация бла муниципал къуралыулада 13 палата Жамауат палата бла 2021 жылны 19 сентябринде келлик айырыулада бирге ишлеуню юсюнден келишимге къол салгъандыла.