Малчылыкъ ахшы эсепле кёргюзтеди

 Быйыл  Зольск районда  малчылыкъ бла байламлы бёлюм ахшы кёрюмдюлеге жетгенди.  Алай бла   биринчи июлгъа чыгъарылгъан эсеплеге кёре, районда мюлклени барысында да    53438 тууар саналады, аладан 22588 сют берген ийнекледиле.   Ол былтыр бу заман бла тенглешдиргенде,  1844 мал башха кёпдю.

Ууакъ малладан да   91145-си  барды,   аладан  55866-сы  ана къойладыла.   Атла уа 5 635-ге  жетедиле.  

Саулай алып айтханда, союлмагъан ауурлукъда тууар этден   39910 центнер эм къойну бла эчкиникинден да 8808 центнер сатылгъанды. Сютден да 44510 центнер сауулгъанды. Орта эсеп бла алып айтханда,  мюлкледе  бир ийнекден 1971  литр алыннганды. Уллу эл мюлк производительледе уа ол 2894 литрге жетеди. Алай бла  суткагъа хар ийнекден 14,2-15,9 литр сют алыннганы белгиленеди.    

Бюгюнлюкде малланы асламысы жайлыкълададыла. Аны бла бирге   сют да аслам сауулады. Къыш кезиуде да бу жаны иш жетишимли барырча мюлкледе анга себеплик этерик   мал ашла хазырлайдыла.