Къоншула бла арада жерни чеклерин тохташдырыу

«Кадастр ишни» эмда «Жеринден тепдирилмеген мюлкню къырал регистрациясыны» юсюнден законлагъа тюрлениуле кийирилгендиле быйыл. Алагъа кёре, къоншула бла келишип, арада чекни къалай тохташдырыргъа боллугъуну юсюнден Федерал кадастр палатада ангылатхандыла.

«Кадастрны юсюнден законда айтылгъаныча, чек къалайда болгъанын тохташдырырдан алгъа къоншу участкаланы иелери бла оноулашып, бир оюмгъа келирге керекди. Бу иш чеклени белгили этгенде неда Бирикген къырал реестрде (ЕГРН) чекни юсюнден информация болмаса, борчлу халда тамамланады. Аны кесин да кадастр инженер тындырады. Аланы арасында эм иги специалистни сайларгъа сюйгенлеге деп «Кадастр инженерлени реестри» деген сервис къуралгъанды. Федерал кадастр палатаны башчысыны орунбасары Марина Семенова айтханнга кёре, аны ким да хайырланыргъа боллукъду.

Чекни тохташдырырдан алгъа кадастр инженер къоншу участкаланы иелери бла тюбешип, аланы неда аланы келечилерини хар биринден да къол салдырып ыразылыкъ (акт) алады. Сюйсе уа, барын да бир кюн жыйып алай оноулашады. Тюбешиу къачан эм къалайда боллугъун адамлагъа письмо бла эм азындан бир ай алгъа билдирирге керекди. Келишиулюкню актына уа чек тюз тохташдырылгъанын кёргенден сора къол салыргъа керекди.

Чекни юсю бла къоншу бла бир оюмгъа келирге амал жокъ эсе, аны юсюнден кадастр инженерге жазып билдирирге тийишлиди. Ол аны келишиулюкню актына къошарыкъды, чекни белгилеген планда да кёргюзтюрюкдю. «Закон бла кадастр инженерни жер даулашлагъа къатышыргъа эркинлиги жокъду. Къоншула келишмеселе, участкаланы регистрациясы этилмейди. Ким тюз неда терс болгъанын тохташдырырча, сюдге барыргъа керекди», - деп белгилегенди Марина Семенова.

Инженер къоншу къайда жашагъанын табалмаса, анга жибериллик билдириу жер-жерли газетде басмаланады. Ол адам аны окъумагъанлыкъгъа да иш этилмей къаллыкъ тюйюлдю. Ол жууап бермесе неда жыйылыугъа келмесе, къоншу бла арада чекни дурус кёргеннге саналлыкъды. Алай болмазча уа жерни иеси МФЦ-гъа барып, кесини почта неда электрон адресин ЕГРН-ге тюшюрюрге керекди.

Бу законну дагъыда бир игиси - энди кадастр инженерлеге сагъынылгъан реестрден сурап информация алыргъа эркинлик бериледи. Ол да кёп тыйгъычланы кетереди.