Ариулукъгъа бла тюз ниетге итиндире

Россей УФСИН-ни КъМР-де бёлюмюнде тиширыула тургъан 4-чю номерли колониясында  "Мисс-Осень 2020" деген ат бла  конкурс ётгенди. Аны къурардан алгъа тутмакъ тиширыула иги кесек хазырланыу ишле бардыргъандыла.

   Учрежденияны клубуну ичи кюз арты тюрсюнлю затла бла жасалгъанды. Анда бу жол башха-башха отрядладан юч къыз эришгендиле. Конкурс сегиз тюрлю жаны бла бардырылгъанды. Тиширыула усталыкъларын модельерликде, артистликде, чыгъармачы адамча, визажистча  кёргюзтюрге керек болгъандыла. Ала кеслери  жазгъан назмуланы окъугъандыла, жырлагъандыла, орус халкъ жомакъладан юзюклени хайырланып, актёр усталыкъларын кёргюзтгендиле, кюз арты бла байламлы соруулагъа жууапла бергендиле. Ахырында уа  тикген жыйрыкъларын кийип чыкъгъандыла.

    Жюрини къауумуна киргенлеге да  конкурсха къатышханлагъа  багъа берген тынч тюйюл эди, нек дегенде къызланы барысы да иги хазырланнгандыла, отрядлары уа хар бирин сёзлери, къарслары бла да  кёллендирир ючюн къалмагъанды. Ахырында "Мисс Осень-2020" деген атха тийишли болгъан да белгиленнгенди, саугъала да берилгендиле.

  Жюриден адамла уа эришиуге къатышханла не жаны бла да усталыкъларын кёргюзтгенлерин белгилегендиле, ала юйлерине,юйюрлерине, жууукъларына, сабийлерине тюз ниет бла, ариу къылыкъ бла терк къайтырларын тежегендиле.

Люба Адилова.