Тёгерекдеги къудуретни сакълауну къайгъысын эте

Бизни къыралда кир-кипчик бла байламлы реформаны магъанасы быллай затланы айырып жыйыу эм жарашдырыу системагъа аз-аздан кёчюудю деп белгилегендиле «Экологистика» регион операторда.

Реформаны хайырындан хар тийреде да белгиленнген регион оператор кир-кипчикни жыйыуда эмда жарашдырыуда керти да уллу тюрлениуле этерикди деп ахшы умут алайды. Жер-жерледе контейнерле орнатыллыкъдыла, быллай затланы айырып жарашдырыучу станцияла эмда заводла ишленирикдиле, эски свалкала уа жабыллыкъдыла. Ол бары да экологиягъа игиди, тёлеуле жыйыуда низамлыкъгъа да келтирликди.

Алай быллай системагъа олсагъат окъуна кёчер амал жокъду. Жангыртыуну биринчи кезиуюнде кир-кипчикни жыйыуну эм ташыуну къолгъа алыргъа тюшгенди. Экинчи кезиуюнде уа жаланда пластик къалгъан-къулгъанланы жыя турурча деп «Экологистика» 62 контейнер орнатханды эм макулатура алгъан мобил пункт къурагъанды.

Бу башламчылыкъны республиканы ара шахарында абонентле дурус кёргендиле. Ала берген пластикни бла къагъытны ызы бла станциягъа элтип, анда пресс-машина бла басып, уллу (150-килограммлыкъ) юлюшле этедиле. Аны хайырындан полигонлагъа алгъын заманладан эсе азыракъ кир-кипчик тёгюледи, дейдиле предприятияда.