Сабийлик муратына ышаннгылы атламла

 Къайсы миллетни да  тамблагъы кюню – ол аны бюгюннгю жаш тёлюсюдю. Шёндю жер-жерледе  окъуп, билим ала, кёп тюрлю усталыкъны жашырынлыкъларына тюшюне тургъан жашларыбыз, бла къызларыбыз жаланда халкъыбызны угъай, саулайда къыралыбызны келир жашаууна, жамауатны  айныууна къошумчулукъ этерикдиле. Гыллыланы Альбина да аланы  санындады. Нальчикде ёсген къызчыкъ мектепде окъуп башлагъынчы окъуна: «Мен МГУ-да билим аллыкъма»,-деп, кесини сабийлик муратын бирсилеге кёп кере эшитдиргенди. Бу вузну юсюнден а аны телевизорда кёрюп, алай билгенди. Ол кюнден башлап, жюрегинде аллай университетде окъурукъма деген умут да кесини жерин тапханды.

Алай а гитче къызчыкъгъа ол заманда кёпле ышарып къойгъандыла. Аны кесине ийнандыргъан, ышандыргъан а атасы Аслан бла анасы  Мадина болгъандыла.

Ол бюгюнлюкде аппасы Ахкёбекланы Жаммени бла аммасы Толгъурланы Налжанны да юслеринден уллу жюрек сюймеклик бла айтады. Ала Бызынгыдандыла. Анасыны ата-анасыдыла. Къартланы, аланы, сабийлени, иш юсюнде чыныгъыуларында, ариу адет-тёрелерибизге, бютюнда бег а шатык, бай ана тилибизге юйрениулеринде уллуду къыйынлары. Андан сора да, белгили къаячыбыз Ахкёбекланы Адилбий да бу юйюрде ёсгенди. Жер-жерледен келген туристле, альпинистле да мында, Бызынгыда, аслам кере къонакъ болгъандыла. Сабийле уа къонакъбайлыгъыбызны ышанларына да ма мында бегирек юйреннгендиле.

Альбинаны школда окъугъан кезиуюне къайтсакъ, ол шахарны тогъузунчу номерли мектебинде билим алгъан заманында тарыхдан,  орус литературадан дерслени айырып сюйгенди. Ана тилибизге уа энчи  эс бургъанды. Ол онбиринчи классда болгъанында малкъар тилден олимпиаданы республика даражалы кесегинде биринчи жер алгъанын бир заманда да унутмазлыгъын белгилейди. Аны бла бирге уа устазы Чочайланы Анжела Мухтаровнаны окъутхан предметин иги билгенин, аны сабийлеге сюйдюрюр ючюн тюрлю-тюрлю сейир амалланы хайырланнганын чертип, аны адамлыкъ ышанларын да хурметлейди.

Дагъыда къызчыкъ сабийлигинден да спорт бла профессионал даражада кюрешгенди. Каратени киокушин тюрлюсюне тренер Зураб Джинчарадзеден юйреннгенди. Андан юниоркаланы арасында регионда -биринчи, ЮФО-да уа экинчи орунлагъа бир ненча кере да чыкъгъанды.

Бютюнда белгилерге тийишли ышан а – ол ЕГЭ-лени барындан да 90-нга жууукъ балла алгъанды. Алай эсе да, биринден да репетиторгъа жюрюмегенди. Сабий окъургъа сюйсе, аллай онгла школда, Интернетде да къуралгъанларын айтады.

Бир къырал экзаменде эсеплери бийик болгъаныны хайыры бла уа ол Москвада Россейни къырал социальный  университетини управление жаны бла факультетини конфликтология ызына окъургъа бюджет бёлюмге киргенди. Билим алыргъа республикадан тышына барама дегенинде да, анга юйде чырмау этгенле болмагъандыла. Жаланда адам кесини муратына халал къыйын бла жетерге тийишлисине тюшюндюргендиле.

Алай  эсе да, юйреннген юйюнгден, шахарынгдан башха жерге кетсенг, аууз бла айтханча, тынч болуп  да  къалмайды. Ата-анасына, школну биргесине тауусхан къарындашына, алыкъа садикге энди жюрюрюк эгешчигине тансыкъ болгъанды  Альбина да. Болсада ары окъургъа келгенин унутмай, бир инсандан артха къалмай билим алыргъа, кесини сабийлик муратына жетерге кюрешгенди. Алай бла сагъынылгъан вузну бакалавриатын къызыл дипломгъа тауусханды.

Окъуугъа келген биринчи кезиуюнден окъуна башлап, студент  активлеге, «Эльбрусоид» къурагъан жумушлагъа, МГУ-да билим алгъан малкъарлы эмда къарачайлы жаш тёлю землячестволаны тюбешиулерине да тири къатышханлай турады. Андан сора да,  анга практиканы Къырал Думада ётерге къадар насып бергенди. Алай бла, экинчи-ючюнчю курслада болгъанында, законла къалай тохташдырылгъанларын, ала къалай алыннганларын тышындан къарап угъай,  ол затны ичинден кёргенди. Быллай практикагъа уа студентлени бош алай жиберип да къоймайдыла, ала тынгылы сайлауладан ётерге керек боладыла.

Андан сора да, Гыллыланы къызчыкълары социология форумлагъа аслам халда къатышханды. Аладан биринде – «Территория смыслов» деген ат бла бардырылгъан тюбешиуде – ол белгили алимлени лекцияларына тынгылап, аланы  къалай сёлешгенлерин, къаллай проблемаланы кётюргенлерин кёрюп, магистратурагъа ол ызда кирлигине толу ийнаннганды. Ол жол а аны эрттеден да сюйген муратына – Москваны къырал университетине – келтиргенди.  Бюгюнлюкде уа, айтханыбызча, Альбина МГУ-ну магистратурасын жетишимли тауусуп, дипломун алгъанды.

Таулу къызчыкъ илму бла да  кюрешеди. Аны  ол затха сейири уа социальный илмуланы доктору, профессор  Агамали Куламович Мамедовну башламчылыгъы бла бютюн ачылгъанды. Бюгюнлюкде аны  социология, управление жаны бла да жазгъан статьялары бир къауум изданияда басмаланнгандыла. Сёз ючюн, аны илму ишлерин Белоруссияны къырал университетини студент альманахында табаргъа боллукъду. Аны хурметге тийишли даражада бир жумушу барды  - ол тюрлю-тюрлю проект ишле бла да кюрешеди. Анасыны эгечи Ахкёбекланы Залина жарашдыргъан «… Но мы вернулись!» дегеннге уа ала бирге кёчгюнчюлюкню юсюнден ол зорлукъну сынагъан адамладан хапарла, суратла да жыядыла. Дагъыда ала Бызынгыны, элни  белгили адамларыны, анда къаллай  жангычылыкъла болгъанларыны юслеринден билдирген инстаграм да къурагъандыла.

Юйюрде ата-анасындан, аппасындан-ыннасындан сора да, адамгъа жашауунда кёп затха тюз къараргъа, къыйматланы багъаларгъа тюшюндюргенле да тюбейдиле, къадар аллай насыпны берсе. Ма аллай инсанладан бирине уа бюгюннгю ушакъ нёгерим аны орус литературадан окъутхан устазы Наталья Николаевнаны санайды. Жашауунда аллай педагогга тюбегени аны жаланда суратлау чыгъармаланы сюерге неда аланы къайсыларын  окъугъан тюздю деген акъылгъа келирге угъай, ол неда бу болумда мен къалай этерик болур эдим деген сагъышха юйретгенин айтады.

Ол, сабийлени аллында жаланда устаз болуп къалмай, кесини тутхан ишине инсанлыкъ борчунача къарагъаны ючюн хурметлегенин да жашырмайды. Адабиятда классиканы окъургъа тюшюннгенни къыйматлылыгъын къатлай,  жашауда ненча жыл озса да, бир зат да тюрленмегенин ма  аллай чыгъармала ачыкълагъанына сейир да этеди. Литератураны юсю бла адамланы къылыкъларына, психологияда да кёп затха юйренирге боллугъун хапарлайды.

Къайсы жаш адамныча, Альбинаны да умутлары уллудула. Ата-анасына да анга ышаннганлары ючюн ыразылыгъын билдиреди. Ала хар заманда да тюзлюкню жолу бла барыргъа тюшюндюргенлерин черте, кесине, жамауатха да хайыр , къууанч келтирлик иш бла кюреширигин айтады.

Къайда тохташып къаллыгъын алыкъа толу билмей эсе да, аны уа къыралыбызны ара шахарында, кесибизни вузубузда да ишлер онгу барды, ол къайда да бет жарыкълы болуруна ийнанабыз. Эндиге дери ёсдюргенлерин,окъутхан устазларын да къууандыра келген къыз мындан арысында да жангы жетишимлери бла аланы барысын да кёллендиргенлей турлугъуна да ышанабыз.